Astanalyqtar tasqyn aımaǵyna taǵy 1 myń tonnaǵa jýyq gýmanıtarlyq kómek jiberdi
ASTANA. KAZINFORM — Astanadan sý tasqynynan zardap shekken óńirlerge 1 myń tonnaǵa jýyq gýmanıtarlyq kómek jiberildi. Búgin elordalyq sportshylardyń, dene shynyqtyrý jáne sport basqarmasynyń kúshimen taǵy 8 tonna gýmanıtarlyq kómek jınalyp, Qostanaı oblysyna jiberildi, dep habarlaıdy elorda ákimdigi.
Dene shynyqtyrý jáne sport basqarmasynyń basshysy Vasılıı Levıt áriptesterine qazirgi qıyn jaǵdaıda kómek kórsetkeni úshin alǵysyn bildirdi.
«Elimizdiń birneshe óńirinde sý tasqyny bolyp jatyr, qazaqstandyq eriktiler qıyn sátte eshqashan shette qalmaıdy. Kóptegen otandastarymyz sý tasqynynan zardap shekkenderge kómektesedi. Astana sportshylary árqashan kómek qolyn sozady. Búgin elordanyń dene shynyqtyrý jáne sport basqarmasy qyzmetkerleri men vedomstvolyq baǵynysty mekemeler qyzmetkerleriniń qatysýymen Qostanaı oblysyna gýmanıtarlyq kómek jiberilip jatyr», — dedi Vasılıı Levıt.
Sondaı-aq, elordalyq sportshylar Ilıa Ilın, Vasılıı Tahtaı, Sergeı Tsyrýlnıkov, Abzal Ajgalıev, Mereı Aqshalov, Aıtym Jaqypov jáne karate federatsııasynyń, gımnastıka federatsııasynyń ókilderi sý tasqynynan zardap shekkenderge gýmanıtarlyq kómek kórsetýde.
Gýmanıtarlyq kómek jınaý áli de jalǵasyp jatyr.
Buǵan deıin AMANAT partııasynyń Astana qalalyq fılıalynyń kúshimen «Jastar rýhy» jastar qanatymen, «Astana jastary» eriktilerimen birlesip, qala ákimdiginiń, qalalyq máslıhat depýtattarynyń, qoǵam qaıratkerleriniń, úkimettik emes uıymdardyń, shaǵyn, orta jáne iri bıznes ıeleriniń qoldaýymen gýmanıtarlyq kómek jınalyp, óńirlerge joldandy.
Sonymen qatar, elordalyq Qazaqstan halqy Assambleıasy Dostyq úıiniń bazasynda sý tasqynynan zardap shekken óńirlerdiń turǵyndary úshin gýmanıtarlyq kómek jınaý boıynsha áleýmettik aktsııa uıymdastyrdy.
Kómek Aqmola jáne Qaraǵandy oblystarynyń turǵyndaryna jetkizildi.
Zardap shekkenderge kıim, tamaq, gıgıena quraldary, tósek-oryn, ydys-aıaq jáne dári-dármek jınaldy.
Esterińizge sala keteıik, elordada gýmanıtarlyq kómekti qabyldaıtyn 9 pýnkt jumys isteıdi, jıynǵa 30-ǵa jýyq eriktiler uıymy qatysady.
Kún saıyn 200-den astam erikti qajetti zattardy suryptap jiberedi.
Jınalǵan kómektiń ishinde kıim, azyq-túlik, gıgıena quraldary men aıaq kıim mańyzdy.
Eriktiler qarjylyq kómek qabyldamaıdy.
Nıet bildirýshiler jınaý oryndaryna qajetti zattardy jınap, ákele alady.
