Astanalyqtar Reseı elshiliginiń aldyna gúl shoqtaryn aparyp jatyr
ASTANA. KAZINFORM – Elorda turǵyndary qaladaǵy Reseı Federatsııasynyń elshiligine gúl shoqtaryn qoıyp, kóńil aıtý jazbasyn qaldyrýda. Bul týraly elshiliktiń baspasóz qyzmeti habarlady.
«Máskeýdegi terrorıstik aktige baılanysty kóńil aıtqysy keletinder kóbeıdi. Sondyqtan Reseıdiń Qazaqstandaǵy elshiligi Kóńil aıtý kitabyn ashty. Kóńil aıtý buryshy Jumabek Táshenov kóshesi tarapynan Elshiliktiń konsýldyq bólimine kire beriste ornalasqan», - dep habarlady elshilik óziniń resmı saıtynda.
Kóńil aıtý kitaby 23 naýryz saǵat 18.00-ge deıin ashyq bolady.
Buǵan deıin habarlanǵandaı, belgisiz bireýler Máskeý túbindegi Krasnogorsk qalasyndaǵy Krokýs sıtı holl ǵımaratynda oq jaýdyrǵan.
Kýágerlerdiń aıtýynsha, qylmyskerler keshki saǵat 20:30 shamasynda, kontsert bastalar aldynda negizgi podezd arqyly ǵımaratqa kirip, kelýshiler men kúzetshilerge birden oq atqan. Sodan úsh-tórt adam kontsert zalyna kirip, kórermenderdi atyp, «Molotov kokteılderin» laqtyra bastaǵan. Osydan keıin shabýyl jasaǵandar qashyp ketken.
Reseıdiń Densaýlyq saqtaý mınıstrligi lańkestik áreketten zardap shekken 145 adamnyń birazynyń tizimin jarııalady.
Qaıǵyly oqıǵaǵa baılanysty Qazaqstan azamattary úshin myna senim telefony boıynsha jedel jeli iske qosyldy: 8 (925) 897-71-14.
QR Syrtqy ister mınıstrligi habarlaǵandaı, Reseıdegi teraktide qaza tapqandar men zardap shekkender arasynda qazaqstandyqtardyń bolǵany týraly aqparat joq.
