Astanalyqtar Parıj olımpıadasynyń ashylýyn ashyq aspan astynda tamashalady
ASTANA. KAZINFORM – Qazir Parıj-2024 Olımpıadasy saltanatty ashylý rásimi ótip jatyr. Jibek Joly telearnasy elorda turǵyndary men qonaqtary úshin aýqymdy sharadan tikeleı translıatsııa jasady.
Elordanyń ortalyq saıabaǵyna bir qaýym jurt jınaldy. Kórermender úlken ekran arqyly Parıj Olımpıadasynyń ashylýyna tikeleı kýá boldy. Qazaqstandyq sportshylardy qoldaýǵa kelgen jurtshylyq aldymen otandyq juldyzdardyń qatysýymen ótken kontsertti tamashalady.
«Elimizdi álemge tanytyp jatqan sportshylarymyz kóp. Parıj Olımpıadasyn mindetti túrde kóremin, ózime boks jaqyn. Jalpy Qazaqstan bokstan álemde úzdik elderdiń qatarynda. Sportshylarymyzǵa sáttilik tileımin, tek júldemen oralsyn», - degen tilek bildirdi tanymal ánshi, kompozıtor Luqpan Joldasov.
Ortalyq saıabaqqa jınalǵandardyń arasynda Olımpıadaǵa attanǵan sportshylardy qoldap, urandatqan kórermenderdi de baıqadyq. Solardyń birqatarynda «Alǵa, Qazaqstan!», «Biz birgemiz!», «Aslanbek, alǵa!», «Smetov chempıon», «Biz sizderge senemiz», «Jeńispen oralyńdar», «Kazahstaný tolko pobedý» degen sekildi qoldaý lebizderi jazylǵan.
«Olımpıada álemdik deńgeıdegi sporttyq mereke. Búgin qazaqstandyq sportshylardy qoldaýǵa arnaıy keldim, bir jaǵynan kórermenderdi ánimmen qýantqym keldi. Barsha otandastarymyzdy bizdiń sportshylardy qoldaýǵa shaqyramyn. Al sportshylarǵa úlken jeńis tileımin. Árıne Olımpıadany mindetti túrde kóremin», - dep aǵynan jaryldy belgili ánshi Zarına Omarova.
Buǵan deıin Jibek Joly arnasy Parıj Olımpıadasynan habar taratýǵa tas-túıin daıyn ekendigin habarlaǵan edik.
Aıta keteıik, Parıj Olımpıadasynyń ashylý saltanatyna oraı astanalyqtar ortalyq saıabaqqa jınaldy. Jibek Joly telearnasy ujymynyń uıymdastyrýymen ótkizilgen keshte astanalyqtar sportshylarymyzǵa sáttilik tiledi.
