Astanalyqtar Otan qorǵaýshylar kúni qandaı is-sharalarǵa bara alady
ASTANA. KAZINFORM — Astanada bul merekege oraı áskerı qyzmetti nasıhattaýǵa jáne patrıottyq qundylyqtardy nyǵaıtýǵa baǵyttalǵan mazmundy baǵdarlama ótedi, dep habarlaıdy ákimdiktiń resmı saıty.
Qala turǵyndary men qonaqtaryna arnap kontsertter, túrli qoıylymdar jáne qoǵamdyq aktsııalar uıymdastyrylady
Negizgi is-sharalardyń biri — 7 mamyr kúni saǵat 11:00–de Qazaq eli monýmenti alańynda ótetin plats-kontsert. Baǵdarlamada áskerı orkestrlerdiń óner kórsetýi, memlekettik organdardyń saptyq esepteri, saptyq daıyndyq elementteri jáne saltanatty bólimshelerdiń kórsetilimdik nómirleri bar. Іs-sharaǵa Qazaqstan Respýblıkasy Memlekettik kúzet qyzmetiniń, Qorǵanys mınıstrliginiń, Іshki ister mınıstrliginiń Ulttyq ulanynyń, Ulttyq qaýipsizdik komıtetiniń Shekara qyzmetiniń jáne Tótenshe jaǵdaılar mınıstrliginiń ókilderi qatysady.
Merekelik is-sharalar Nurjol jelekjoly aýmaǵynda jalǵasady. Munda saǵat 15:00–de Qazaqstan Qarýly kúshteri Ulttyq áskerı-patrıottyq orkestriniń saltanatty sherýi ótedi.
Mádenı baǵdarlama qalanyń ózge alańdarynda da uıymdastyrylady. «Astana Arena» stadıony aýmaǵynda Open air formatyndaǵy is-shara ótedi: saǵat 10:00–den bastap jármeńkeler, saýda oryndary men balalar aımaqtary jumys isteıdi, al 19:00–de qazaqstandyq estrada juldyzdarynyń qatysýymen keshki kontsert uıymdastyrylady.
Osy kúni saǵat 18:00–de Ázerbaıjan Mámbetov atyndaǵy memlekettik drama jáne komedııa teatry sahnasynda kórermenderge «Tynyshtyq kúzetshisi» spektakli usynylady.
7 mamyr kúni saǵat 17:00–de Esil aýdanyndaǵy Jetisý saıabaǵy jáne 8 mamyr kúni M. Ótemisuly atyndaǵy Oqýshylar saraıy mańyndaǵy Arbatta merekelik kontsertter ótedi. Baǵdarlama aıasynda áskerı kórsetilimdik defıle men kontserttik qoıylymdar uıymdastyrylady.
Sonymen qatar, 7 mamyr kúni saǵat 19:00–de Oqýshylar saraıy mańyndaǵy Arbatta QR Ulttyq ulany áskerı qyzmetshileri men orkestriniń qatysýymen merekelik baǵdarlama ótedi.
Budan bólek, elordada polıtsııa jáne tótenshe jaǵdaılar qyzmeti bólimshelerinde ashyq esik kúnderi uıymdastyrylady. Jastar úshin ekskýrsııalar, ardagerlermen kezdesýler jáne áskerı-patrıottyq is-sharalar ótkiziledi.
Qala mektepteri men kolledjderinde oqýshylardy «Jas sarbaz» qozǵalysynyń qataryna qabyldaý boıynsha saltanatty rásimder ótedi. Bul bastamalar jastardyń patrıottyq tárbıesin qalyptastyrýǵa jáne azamattyq jaýapkershiligin arttyrýǵa baǵyttalǵan.
Astanada Otan qorǵaýshylar kúni áskerı qyzmetshiler men jaýyngerlik dástúrlerge qurmet kórsetip qana qoımaı, patrıotızm, zańdylyq, jaýapkershilik jáne el birligi qundylyqtaryn nasıhattaıtyn mańyzdy qoǵamdyq is-sharaǵa aınalady.
Buǵan deıin Astanada 300-ge jýyq adam qatysqan patrıottyq fleshmob ótkenin jazdyq.
