Astanalyqtar olımpıada chempıondarmen birge 10 myń qadam júrdi
ASTANA. KAZINFORM — Elordada Sport aptalyǵy bastaldy. Botanıkalyq baqta júzdegen turǵynnyń basyn qosqan «10 000 qadam» aktsııasyna Qazaqstannyń olımpıada chempıondary men belgili sportshylary qatysty.
Jıyn fıtnes-jattyqtyrýshy Aısha Baımahanovanyń boı jazý jattyǵýlarymen bastaldy. Odan keıin turǵyndar Olımpıada chempıondary Serik Sápıev, Dmıtrıı Balandın, ıÝrıı Melnıchenko, júldegerler Vasılıı Levıt, Ádilbek Nııazymbetov, Islam Baıramýkov, sondaı-aq Almat Kebisbaev, Anna Alıabeva, Olga Tıhonova jáne Denıs Nıkıshamen birge 10 myń qadamdyq qashyqtyqty eńserdi.
Sharaǵa qatysqan Týrızm jáne sport mınıstri Erbol Myrzabosynov buqaralyq sportty damytý memlekettik saıasattyń basty baǵyty ekenin jetkizdi.
— Búginde sport qazaqstandyqtardyń kúndelikti turmys saltyna enip keledi. Memleket basshysynyń tapsyrmasymen salada aýqymdy reformalar júrip jatyr. Negizgi basymdyq — balalar men buqaralyq sport. Basty maqsat — turatyn jerine qaramastan, ár balanyń sportpen shuǵyldanýyna qoljetimdi jaǵdaı jasap, salaýatty ómir saltyn jalpyhalyqtyq ádetke aınaldyrý, — dedi mınıstr.
Qazir el halqynyń 44%-dan astamy, al balalardyń 34%-y, ıaǵnı 1,8 mln bala sportpen turaqty túrde aınalysady. 2029 jylǵa qaraı bul kórsetkishti 50%-ǵa jetkizý kózdelgen.
Sharaǵa jınalǵan sport maıtalmandary da turǵyndarǵa óz lebizin bildirdi. Olımpıada chempıony Dmıtrıı Balandın bul kúnniń barsha jurtty biriktiretin mereke ekenin aıtty.
— Ár mamandyqtyń ózindik tól merekesi bar. Al Sport kúni — tek kásibı sportshylardyń emes, salaýatty ómir saltyn ustanatyn barsha qaýymnyń basyn qosatyn qýanysh. Búgingi jıynnyń da basty maqsaty — turǵyndardy sportqa baýlyp, sergektik syılaý, — dedi ol.
Mundaı buqaralyq bastamalardyń densaýlyqty nyǵaıtýdaǵy paıdasyn sóz etken Olımpıada júldegeri Islam Baıramýkov jastardy salaýatty ómir saltyn ustanýǵa shaqyrdy.
— Myna jerde qanshama adam erte turyp, denesin shynyqtyryp jatyr. Jastarǵa aıtarym tek toı-dýman qýmaı, tańerteń erte turyp, densaýlyqqa ýaqyt bólińizder. Alda Azııa oıyndary men álem chempıonattary kútip tur. Úlken jarystarda kók týymyzdy jelbiretý úshin osyndaı tabandylyq pen tyńǵylyqty daıyndyq kerek, — dep túıindedi sportshy.
Dástúrli Sport kúni qarsańynda uıymdastyrylǵan aptalyq aıasynda el boıynsha 250-den astam buqaralyq shara ótedi. Ótken jyly Qazaqstanda 147 sport nysany salynsa, búginde 600 myńnan astam bala tegin sektsııalar men sport mektepterinde shynyǵyp jatyr.
Aıta keteıik, buǵan deıin, «Bolashaq oıyndary — 2026» halyqaralyq týrnıriniń qorytyndysyn jazǵan edik.
