Astanalyqtar Momyshulynyń soǵysta qoldanǵan zattaryn tamashalaı alady
ASTANA. KAZINFORM – Elordadaǵy Ulttyq mýzeıde «Batyrlar – urpaq esinde» atty kórme ashyldy.
Onda Baýyrjan Momyshulynyń soǵys kezinde syzǵan áskerı strategııalyq kartasy, Málik Ǵabdýllınniń «Altyn juldyz» medali, Álııa Moldaǵulovanyń Joǵarǵy Keńes Prezıdıýmynyń gramotasy, Keńes Odaǵynyń batyrlarynyń áskerı kıimderi, jeke zattary qoıylǵan. Kórmeden ekinshi dúnıejúzilik soǵystaǵy qarýlardyń sımvolyna aınalǵan Maksım markaly pýlemetti de kórýge bolady. Sondaı-aq sol kezdegi áskerı vıntovka, Keńes áskeriniń sý ishetin qutysy, qasyǵy sekildi qundy jádigerler de bar.
Qazaqtyń aty ańyzǵa aınalǵan mergen qyzy Álııa Moldaǵulovanyń sińlisi Sapýraǵa jazǵan hattary da kórermen nazaryna usynylǵan.
Odan bólek, kórmede «Atamnyń amanaty» qoǵamdyq birlestiginiń materıaldary usynyldy. Bul — elimizdegi Ekinshi dúnıejúzilik soǵystan oralmaǵan, iz-túzsiz ketkender qataryna jatqyzylǵan qazaqstandyq jaýyngerlerdi izdeýmen aınalysatyn jalǵyz qoǵamdyq uıym.
— «Atamnyń amanaty» birlestigi 2019 jyly qurylǵan. Sodan beri halyqtan 10 myńnan astam ótinish qabyldap, 4 myń adamǵa atalarynyń jerlengen jerin taýyp berdik. Soǵysqa qatysqan barlyq elmen, ıaǵnı sondaǵy qoǵamdyq birlestikter, Úkimet jáne elshiliktermen memorandým jasasqanbyz. Olar bizge qazaqstandyq jaýyngerlerdiń tizimin berip turady. Qazir qolda 28 myńnan astam jaýyngerdiń tizimi bar. ıAǵnı, Qazaqstannan soǵysqa attanǵan sonsha adamnyń jerlengen jeri belgili. Endi sol jaýyngerlerdiń urpaqtaryn izdeýmen aınalysyp jatyrmyz, - deıdi atalǵan qoǵamdyq birlestiktiń Eriktiler júıesiniń úılestirýshisi Marfýza Súleımenova.
Kórme dańqty batyrlar Baýyrjan Momyshulynyń 115, Málik Ǵabdýllınniń 110, Álııa Moldaǵulovanyń 100 jyldyǵyna oraı uıymdastyrylyp otyr. Onyń ereksheligi – úsh birdeı mýzeıdiń qoryndaǵy buıymdar qoıylǵanynda. Atap aıtqanda, Jambyl tarıhı-ólketaný mýzeıi, Álııa Moldaǵulovanyń memorıaldyq mýzeıi jáne Málik Ǵabdýllın mýzeıinen jádigerler jetkizilgen.
Aıta keteıik, búgin Almatyda Jeńistiń 80 jyldyǵyna arnalǵan kórme ashyldy.