Astanalyqtar kúresten álem chempıony Aıdos Sultanǵalıdy kútip aldy
ASTANA. KAZINFORM — Horvatııa astanasy Zagreb qalasynda grek-rım kúresinen álem chempıony atanǵan Aıdos Sultanǵalı (60 keli) elge oraldy.
Álem chempıonyn elorda turǵyndary, QR týrızm jáne sport mınıstrligi, sondaı-aq áskerı qyzmetshiler áýejaıdan saltanatty kútip aldy.
Aıdosty áýejaıda ulttyq mýzkanyń áýezdi sazy jáne áskerı orkestirdiń aıbyndy úni qarsy aldy. Sonymen qatar, álem chempıony ulttyq taǵamymyz baýyrsaqtan dám tatyp, qymyzdan sýsyndady.
Aıta keteıik, Prezıdent grek-rım kúresinen álem chempıony Aıdos Sultanǵalıdy quttyqtady.
Osyǵan deıin habarlaǵanymyzdaı, Aıdos Sultanǵalı Qazaqstan tarıhynda grek-rım kúresinen 26 jyldan keıin álem chempıonatynda altyn aldy.
Sondaı-aq Aıdos Sultanǵalıdiń ata-anasy balasynyń jeńisi týraly aıtyp, ulynyń jeńiske jetetinine senim bildirgen.