Astanalyqtar kósheden qoqys kórse kótere me — eksperıment
ASTANA. KAZINFORM — Astana turǵyndary arasynda áleýmettik eksperıment júrgizildi.
Bul shara elorda turǵyndarynyń ekologııalyq mádenıetti qalaı saqtaıtynyn jáne qorshaǵan ortanyń tazalyǵyna qamqorlyǵyn anyqtaýǵa kómektesti.
Uıymdastyrýshylar Esil ózeniniń jaǵasyndaǵy jaıaý júrginshiler kóshesine bos bótelke, qaǵazdar jáne basqa da qoqystardy tastady.
Túsirilim toby ary-beri ótken adamdar jerde jatqan qoqysty kótere me, ony arnaıy qoqys jáshigine sala ma — sony baqylap otyrdy.
Áleýmettik eksperıment barysy jasyryn kameraǵa túsirildi.
Vıdeodan elorda turǵyndary qorshaǵan ortanyń tazalyǵyna beı-jaı qaramaı, jerde jatqan qoqysty arnaıy jáshikke tastaıtynyn baıqaýǵa bolady.
«Biz Astana turǵyndarynyń tazalyqty saqtaǵanyn kórdik. Buǵan bir saǵattaı qarap kóz jetkizdik. Eresekter de, balalar da jerde jatqan qoqysty arnaıy qoqys jáshigine tastaıtynyn kórip qýandyq. Bárimiz aınalamyzdaǵy tazalyqqa jaýaptymyz. Kommýnaldyq salanyń qyzmetkerleri ǵana emes, árbir turǵyn bizdiń qalamyzdyń taza ári jaıly bolýyna óz úlesin qosýy tıis dep sanaımyz», — dep atap ótti uıymdastyrýshylar.
Astanada «Taza Qazaqstan: Astana — tazalyq pen tártiptiń úlgisi» aýqymdy ekologııalyq aktsııasy ótip jatyr.
Bul apta «Móldir bulaq» dep atalady, onyń barysynda sý aıdyndary — ózender men kólderdiń aınalasy qoqystan tazartylady.
Aýqymdy ekoaktsııa aıasynda qalany sanıtarlyq tazartý, nóser jáne aryq káriz jelileri, kóshelerdi, trotýarlardy, kvartalishilik aýmaqtardy, qoǵamdyq keńistikter men aýlalardy tazalaý jumysy júrgizilip jatyr.
Sondaı-aq, jasyl jelekti kútip-baptaý jáne otyrǵyzý, saýda nysandaryna irgeles aýmaqtardy jınaý, kógaldar men gúlzarlardy ornatý, ruqsat etilmegen polıgondardy joıý isi jolǵa qoıylǵan.
