Astanalyqtar úzdik anımatsııalyq týyndylardy tegin tamashalaı alady

ASTANA. KAZINFORM — Astanada Ulttyq anımatsııalyq fılmder aptalyǵy bastaldy, dep habarlaıdy Mádenıet jáne aqparat mınıstrliginiń baspasóz qyzmeti.

Mınıstrlik atap ótkendeı, is-shara Respýblıka kúnine, Memlekettik egemendik týraly deklaratsııanyń 35 jyldyǵyna jáne Halyqaralyq anımatsııa kúnine oraı uıymdastyryldy.

Ashylý rásimine elimizdiń shyǵarmashylyq mamandyqtarynda oqıtyn stýdentter, balalar men ata-analar, jas sýretshiler jáne kınosúıer qaýym qatysty.

Aptanyń alǵashqy kórsetiliminde tolyqmetrajdy «Altyn adam» anımatsııalyq fılmi usynyldy. Fılmde erlik, rýh jáne otanshyldyq týraly oqıǵa baıandalady.

— Bes kún ishinde kórermenge qazaqstandyq anımatorlardyń úzdik týyndylary kórsetiledi. Olardyń ishinde «Muzbalaq», «Aqsaq qulan», «Ámen aǵa aǵashy» jáne basqa mýlfılmder bar, — delingen habarlamada.

Aıta keteıik, aptalyqtyń maqsaty — ulttyq anımatsııany nasıhattaý, jas avtorlardy qoldaý jáne otandyq mádenıetke qyzyǵýshylyqty arttyrý.

Barlyq kórsetilim 20–24 qazan aralyǵynda «Qazaqstan» Ortalyq kontsert zalynda (Máńgilik el dańǵ., 10/1) ótedi. Kirý tegin. Saǵat 16:00 bastalady.

Budan buryn Astanada «Ulttyq anımatsııalyq fılmder aptalyǵy» ótetinin jazǵan edik.