Astanalyqtar qarjy pıramıdasyn Telegram-bot arqyly anyqtaı alady

Astana qalasy ekonomıkalyq tergeý departamentiniń 2 tergeý basqarmasynyń basshysy Tımýr Muqanov qarjy pıramıdasynyń qurbany bolmaý joldaryn aıtyp berdi, dep habarlaıdy Kazinform.

«Qazirgi ýaqytta Astana qalasy boıynsha ekonomıkalyq tergeý departamentinde Qnet, Antares, Best Road Investment sııaqty qarjy pıramıdalaryna qatysty birqatar qylmystyq is tergelip jatyr. Zańdy kúshine engen úkimder bar, onda sottalýshylar naqty merzimge bas bostandyǵynan aıyrylǵan. Sondaı-aq, Departament oıyn bıznesine, oıyn apparattaryna, termınaldarǵa qarsy is-qımyl boıynsha birqatar sharalar júrgizýde. Óıtkeni oıyn mekemeleri qazirgi qoǵamnyń áleýmettik problemalarynyń birine aınaldy. Ásirese adamdar psıhologııalyq turǵydan oıynǵa táýeldi bolyp, jeke jınaqtaryn, múlikterin sata bastaıdy. Qaıǵyly saldar oryn alyp jatyr», — dedi Tımýr Muqanov Astana qalasynyń kommýnıkatsııalar qyzmetinde ótken brıfıngte.

Spıkerdiń aıtýynsha, ınternet-resýrstardy tekserý boıynsha «Baıqa, pıramıda!» Telegram-boty iske qosyldy.

Endi azamattar saıttar men áleýmettik jelilerdi qarjylyq pıramıda qaýpin óz betinshe tekserip, baǵamdaı alady.

Sonymen birge, T. Muqanov qarjy pıramıdasyn qalaı anyqtaý kerektigin aıtty.

«Blogerlermen jumys istep jatyrmyz. Jaqynda Dınara Sátjanmen suhbattastyq, onda qarjy pıramıdalarynyń barlyq belgilerin sıpattap berdik. Uıymnyń iskerlik bedelin BAQ, áleýmettik jeliler arqyly tekserý qajet. Osy qarjy pıramıdasyna ınvestıtsııa salýdyń qajeti joq dep jazylǵan túsiniktemelerdi oqyp shyǵý kerek. Táýelsiz sholýlardy izdep oqyp, joǵary tabys týraly ýádelerge senbeýińiz kerek. Árbir qarjy pıramıdasyndaǵy birinshi nárse — siz aı saıyn salǵan qarajattyń 40-70% aralyǵynda joǵary kiris ýáde etý. Bir de bir uıym mundaı naqty emes kiristi ýáde ete almaıdy», — dep atap ótti tergeý basqarmasynyń basshysy.