Astanalyqtar dıabetke qarsy tegin skrınıngten óte alady
Astanada dıabetke qarsy kúres kúni qarsańynda elorda turǵyndary men qala qonaqtary tegin skrınıngten ótip, óz densaýlyǵyn teksere alady, dep habarlaıdy Kazinform.
14 qarasha – Búkilálemdik dıabetke qarsy kúres kúni. Bul kúni ınsýlındi oılap tapqan ǵalym, Nobel syılyǵynyń laýreaty Frederık Bantıng dúnıege kelgen.
Halyqaralyq dıabet federatsııasynyń (IDF) derekteri boıynsha álemde shamamen 537 mıllıon adam qant dıabetimen aýyrady.
QR Densaýlyq saqtaý mınıstrliginiń málimetine súıensek, búginde Qazaqstanda 400 myńnan astam adam qant dıabeti aýrýyna shaldyqqan. Jyl saıyn elimizde orta eseppen 18-30 myń adamǵa osy dıagnoz qoıylady.
Osyǵan baılanysty UMC Dıagnostıka ortalyǵy Astana turǵyndary men qala qonaqtaryn dıabetke qarsy tegin skrınıngten ótýge shaqyrady. Ortalyqtyń endokrınolog dárigerleri kelýshilerdiń glıýkozasyn ólshep, keńes beredi.
Tegin skrınıngten Astana qalasy Syǵanaq 46 mekenjaıyndaǵy Respýblıkalyq dıagnostıkalyq ortalyqta 14 qarasha kúni saǵat 8:00-16:00 aralyǵynda ótýge bolady.
