Astanalyqtar demalysta qandaı aýyl sharýashylyǵy ónimderin arzanǵa ala alady
ASTANA. KAZINFORM — Astanadaǵy jármeńkede Pavlodar, Soltústik Qazaqstan jáne Ulytaý oblystarynyń ónimderi usynylady, dep habarlaıdy elorda ákimdiginiń resmı saıty.
Astanada 17-18 qazan kúnderi Soltústik Qazaqstan, Pavlodar jáne Ulytaý oblystarynyń taýar óndirýshileri qatysatyn kezekti aýyl sharýashylyǵy jármeńkesi ótedi. Úsh óńirdiń sharýalary elorda turǵyndary men qonaqtaryna 1600 tonnadan astam azyq-túlik ónimin usynady.
Jármeńkede et jáne et ónimderi, sút ónimderi, kókónister, jumyrtqa, balyq, bal, bakaleıa taýarlary jáne basqa da azyq-túlik túrleri satylady.
Soltústik Qazaqstan oblysynan 1000 tonnadan astam ónim jetkiziledi. Onyń ishinde 110 tonna et jáne et ónimderi, 400 tonnadan astam kókónis, 180 tonnadan astam sút ónimderi, 80 tonnadan astam bakaleıa taýarlary, 5 tonna balyq, 10 tonna bal, sondaı-aq 240 myń dana taýyq jumyrtqasy bar.
Pavlodar oblysynyń taýar óndirýshileri 110 tonna et jáne et ónimderin, 440 tonna kókónis, 17 tonna sút ónimderin, 24 tonna bakaleıa taýarlaryn, 14 tonna balyq, 10 tonna bal, 100 myń dana taýyq jumyrtqasyn jáne basqa da ónimderdi usynady.
Ulytaý oblysynan jármeńkege 60 tonna et jáne et ónimderi, 20 tonna sút ónimderi jáne basqa da azyq-túlik taýarlary jetkiziledi.
Ákimdik málim etkendeı, aýyl sharýashylyǵy jármeńkelerin ótkizýdiń negizgi maqsaty — elorda turǵyndaryn qoljetimdi baǵamen sapaly otandyq ónimdermen qamtamasyz etý. Satyp alýshylar azyq-túlik taýarlaryn deldalsyz, tikeleı óndirýshilerden satyp ala alady.
Buǵan deıin aýyl sharýashylyǵy jármeńkelerinde myń tonnadan astam ónim satylǵanyn jazǵanbyz.
