Astanalyq jastar Desanttyq-shabýyldaý áskerleriniń qataryna qosyldy
ASTANA. KAZINFORM — 2025 jylǵy kúzgi shaqyrý naýqany aıasynda Astana qalasynyń jıyn pýnktinen 40 jas sarbazdan quralǵan komanda Almaty qalasynda ornalasqan desantshylar bólimine merzimdi áskerı qyzmet atqarýǵa jóneltildi.
Qorǵanys mınıstrligi baspasóz qyzmetiniń málimetinshe, jastardy saltanatty túrde shyǵaryp salýǵa qala ákimdiginiń ókilderi, Qarýly kúshterdiń ardagerleri, áskerı qyzmetshiler, sondaı-aq shaqyrylýshylardyń týǵan-týystary men jaqyndary qatysty.
Bolashaq desantshylardy quttyqtaǵan Astana qalasynyń qorǵanys isteri jónindegi departamentiniń ókili zapastaǵy polkovnık Ǵanı Artyqov jastarǵa aq jol tiledi.
— Desanttyq-shabýyldaý áskerleri qatarynda qyzmet etý — áskerı boryshty óteý ǵana emes, bul — úlken jaýapkershilik pen aıryqsha mártebe. Mundaı elıtalyq bólimshelerge tek dene daıarlyǵy myqty, tártipti jáne yntaly jastar ǵana irikteledi. Kóptegen jastar úshin bul — erlik mektebi, shynyǵý men naǵyz otanshyldyqty boıǵa sińiretin ómirlik sabaq, — dep atap ótti ol.
Ásker qatarynda jas sarbazdar suranysqa ıe áskerı-eseptik mamandyqtardy meńgerip, armııada da, azamattyq ómirde de qajet bolatyn bilim men daǵdylardy ıgeredi.
Shaqyrylýshylardy shyǵaryp salýshylardyń arasynda Altaı Aıbarovty qoldaý úshin otbasymen birge kelgen Lola Aıtmaǵambetova da bar.
— Eki ulym da Desanttyq-shabýyldaý áskerleri qatarynda qyzmet etti. Olar bul ómir kezeńin áli kúnge deıin maqtanyshpen eske alady. Aıbar da ózin laıyqty kórsetip, boryshyn adal atqaryp, er jetip oralady dep senemin, — dedi ol.
2025 jylǵy kúzgi shaqyrý naýqanynyń josparyna sáıkes, QR Qarýly kúshterine, basqa da áskerler men áskerı quralymdarǵa 22 myńnan astam jas azamat shaqyrylady. Olardyń qatarynda 1 200-den astam elordalyq jas bar.
Osyǵan deıin Shymkentte 35 jas sarbaz áskerı boryshyn óteýge attanǵanyn jazǵanbyz.