Astanalyq jas hokkeıshiler Kanadadaǵy bedeldi týrnırde kúmis júlde qanjyǵalady
ASTANA. KAZINFORM – Astanalyq jas hokkeıshiler komandasy alǵash ret Quebec International Pee-Wee Hockey Tournament halyqaralyq týrnırine qatysyp, AA-Elites (11–12 jas) sanatynda kúmis júldeger atandy. Bul týraly elorda ákimdiginiń resmı saıty jazdy.
65-shi halyqaralyq Pee-Wee hokkeı týrnırine 16 elden 120 úzdik komanda qatysty. Týrnır Kanadanyń Kvebek qalasynda ótti.
– Astana qalasynda daıyndaldyq. Biz osy bedeldi týrnır tarıhyna engenimizge óte qýanyshtymyz. Bul – biz úshin alǵashqy tájirıbe jáne óz komandamyzben maqtanamyz. Eń este qalǵan sát – fınaldyq oıyn, ony 12 myń kórermen tamashalady, – dedi komandanyń bas bapkeri Vladımır Zaharov.
Aıta keteıik, bul týrnırge Astana qalasy ákimdigine qarasty №10 balalar men jasóspirimderdiń shaıbaly hokkeıden mamandandyrylǵan sport mektebiniń tárbıelenýshileri qatysty.
Kanadanyń Pee-Wee Hockey Tournament halyqaralyq týrnıri 1960 jyldan beri jyl saıyn ótkizilip keledi jáne 12 jasqa deıingi hokkeıshiler arasyndaǵy álemdegi eń bedeldi jarystardyń biri bolyp sanalady.
Buǵan deıin habarlanǵandaı, «Aqjaıyq» qatarynan 20 oıyndy jeńispen aıaqtady.