Astanalyq ustaz Eýropada turatyn qazaq balalaryna ana tilin tegin úıretip júr
ASTANA. KAZINFORM – Astanalyq muǵalim Eýropa elderinde turatyn qazaq balalaryna ana tilin tegin oqytyp keledi, dep habarlaıdy elorda ákimdiginiń resmı saıty.
Oqýshylardyń jasy ártúrli bolǵanymen, pedagog sabaq barysynda taqyrypty barynsha jan-jaqty túsindirip, balalardyń qyzyǵýshylyǵyn birden oıatady. Ustaz bul eńbegin óziniń azamattyq ári kásibı paryzy dep sanaıdy.
Gúljazıra Bekbolatqyzy – elordadaǵy №104 «Keleshek mektebi» jalpy bilim beretin mektebiniń qazaq tili men ádebıeti pániniń muǵalimi. Germanııaǵa biliktiligin arttyrý maqsatynda barǵan saparynda ol sheteldegi qandastarymen tanysyp, olardyń balalary ana tilin úırenýge yntaly ekenin ańǵarǵan. Osydan keıin pedagog óz bilimin aqysyz úıretýge bel býyp, eriktilik negizdegi sabaǵyn bastap ketken.
«2023 jylǵy Eýropa saparynan keıin sheteldegi qazaq balalaryna sabaq ótkizsem degen oı týdy. 2024 jyldyń 1 maýsymynan beri osy isti negizgi jumysymmen qatar alyp júrmin. Ár jeksenbi saıyn Nıderland pen Germanııada turatyn qazaq balalaryna onlaın formatta ana tili sabaǵyn ótkizemin. Kúndelikti ómirde olar ózderi turatyn eldiń tilinde sóılegendikten, qazaqsha aktsentpen sóıleıdi. Soǵan qaramastan, til úırenýge degen qulshynystary erekshe. Muny men ustazdyq joldaǵy paryzym dep bilemin», – deıdi Gúljazıra Bekbolatqyzy.
Sabaq barysynda balalar tek til úırenip qana qoımaı, ulttyq mádenıetpen de tereń tanysady. Olar qazaq halqynyń salt-dástúri, ádet-ǵurpy, shejiresi men aýyz ádebıeti úlgilerin oqyp, tarıhı Otany týraly bilimin keńeıtedi. Muǵalim shákirtterin yntalandyrý úshin arnaıy sertıfıkattar tabystaıdy.
Pedagog áleýmettik jelidegi paraqshasynda bul sabaqtardyń ózi úshin erekshe mánge ıe ekenin jazǵan. Onyń aıtýynsha, onlaın formatqa qaramastan, árbir sabaq rýhanı jaqyndyqty arttyryp, balalardy qazaq tilinde erkin oılaýǵa baýlıdy. Sabaqta túrli shyǵarmashylyq tapsyrmalar beriledi: óleń jattaý, maqal-mátelder úırený, jańyltpash aıtý, róldik oıyndar uıymdastyrý, komıks salý, otbasylyq suhbattar júrgizý. Munyń bári balalardyń fýnktsıonaldyq saýattylyǵyn damytýǵa baǵyttalǵan.
Oqýshylar da sabaqtardyń qyzyqty ótetinin aıtady. Germanııada turatyn Safııa Serik qazaq tilinde kóptegen óleń, jumbaq, maqal-mátel úırengenin jetkizse, Aıda Ábjekenova tyıym sózderdi sýret arqyly beınelep, ulttyq oıyndar oınaǵandaryn qýana eske alady. Balalar úshin bul sabaqtar tek til úırený emes, ulttyq bolmyspen baılanys ornatýdyń mańyzdy quralyna aınalǵan.
Shetelde ósip kele jatqan qazaq balalaryna ana tilin úıretý – ult bolashaǵy úshin asa mańyzdy is. Osy bastama arqyly Gúljazıra Bekbolatqyzy ózge áriptesterine de úlgi kórsetip, ustazdyqtyń shynaıy mıssııasy bilimmen bólisý ekenin dáleldep otyr.
Aıta keteıik, Petropavlda egiz boıjetken ustazdyq joldy tańdap, muǵalim bolyp júr.