Astanalyq ustaz erekshe balalarǵa matematıkany úıretýdiń jańa ádisin oılap tapty
ASTANA. KAZINFORM — Erekshe balalarǵa matematıkany úıretken astanalyq ustazdyń ádisi nátıje berdi, dep habarlaıdy elorda ákimdiginiń resmı saıty.
Astana qalasyndaǵy № 96 mektep-gımnazııasynyń matematıka pániniń ustazy, pedagog-novator Aıgúl Qaıratqyzy erekshe bilim berý qajettilikteri bar oqýshylarǵa matematıkany tıimdi meńgertýdiń avtorlyq ádistemesin qoldanyp keledi. Ustaz Sıngapýrlyq matematıka kýrsyn júrgizip, matematıkalyq uǵymdardy arnaıy manıpýlıatıvter — kórneki ári qolmen ustaýǵa bolatyn oqý quraldary arqyly túsindiredi.
Bul ádis oqýshylarǵa abstraktili sandar men matematıkalyq uǵymdardy tek tyńdaý arqyly emes, kózben kórip, qolmen ustap, naqty áreket arqyly meńgerýge múmkindik beredi.
Pedagogtiń aıtýynsha, mundaı tásil balalardyń pánge degen qyzyǵýshylyǵyn arttyryp, sabaqtaǵy belsendiligin kúsheıtýge yqpal etedi. Ata-analar men ustazdar da oqýshylardyń matematıkaǵa degen yntasy artqanyn baıqaǵan.
— Ádistemeniń taǵy bir ereksheligi — oqýshylardyń matematıkalyq uǵymdardy manıpýlıatıvter arqyly meńgerip qana qoımaı, olardy aǵylshyn tilinde túsindire bilýi. Bul balanyń matematıkalyq bilimin tereńdetip, logıkalyq oılaý jáne tildik daǵdylaryn qatar damytýǵa múmkindik beredi, — deıdi ol.
Pedagogtyń avtorlyq tásiliniń tıimdiligi oqýshylardyń jetistikterinen de kórinis tapty. Aıgúl Qaıratqyzy daıyndaǵan oqýshylar Halyqaralyq Sıngapýrlyq matematıka olımpıadasynyń óńirlik kezeńinde І jáne ІІІ oryndardy ıelenip, Malaızııada ótetin halyqaralyq kezeńge joldama aldy. Bul — zamanaýı oqytý ádisterin tıimdi qoldanýdyń, pedagogtiń kásibı izdenisiniń jáne oqýshylardyń tabandylyǵynyń nátıjesi.
Aıgúl Qaıratqyzynyń tájirıbesi erekshe bilim berý qajettilikteri bar balalarǵa matematıkany oqytýda kórnekilik pen praktıkalyq áreketti ushtastyrýdyń tıimdiligin kórsetedi. Mundaı ádis oqýshylardyń pánge qyzyǵýshylyǵyn arttyryp qana qoımaı, olardyń óz múmkindigine degen senimin qalyptastyrýǵa da yqpal etedi.
Budan buryn qazaqstandyq oqýshylar matematıka olımpıadasynda álemniń úzdik 25 quramasynyń qataryna engenin jazǵanbyz.
