Astanalyq shabandozdar el chempıonatynda qola júldeger atandy
ASTANA. KAZINFORM — Astana qalasy kókpardan eresekter arasynda Qazaqstan chempıonatynyń qola júlde enshiledi, dep habarlaıdy elorda ákimdiginiń resmı saıty.
Shymkent qalasynda kókpardan eresekter arasyndaǵy XXIV Qazaqstan Respýblıkasynyń chempıonaty óz máresine jetti.
Bul dodaǵa elimizdiń túkpir-túkpirinen kelgen 180-nen astam kókparshy qatysyp, 15 komanda qurap, 4 topqa bólinip synǵa tústi.
Ár toptan úzdik shyqqan komandalar jartylaı fınalǵa joldama alyp, aqtyq synda baqtaryn synady.
Jeti kúnge sozylǵan dúbirli básekede Jambyl oblysynyń «Áýlıeata» kókpar komandasy óz rekordyn jańartyp, taǵy bir márte jeńiske jetip, Qazaqstannyń 15 dúrkin chempıony atandy.
Shymkent qalasynyń komandasy kúmis medal ıegeri bolsa, Astana qalasynyń kókpar komandasy Qyzylorda oblysynyń kókparshylaryn 3:2 esebimen utyp, úzdik úshtiktiń qatarynan kórinip, el chempıonatynyń qola júldegeri atandy.
Sondaı-aq, chempıonat barysynda sheber óner kórsetken jekpe-jek attarynyń saıysy marapattalyp, astanalyq «Saıan» sáıgúligi chempıon atandy. Jeńimpazdar men júldegerler, sondaı-aq úzdik óner kórsetken sportshylar Qazaqstan Respýblıkasy Kókpar federatsııasynyń aqshalaı syıaqysymen marapattaldy.
Aıta keteıik, bul dúbirli doda — Qazaqstan chempıonatynyń tarıhyndaǵy 24-shi márte uıymdastyrylǵan el chempıonaty.
Osyǵan deıin Qostanaı oblysynda kókpar kezinde at shabandozdyń ústine qulap túskenin jazǵanbyz.