Astanalyq shabandozdar Búkilreseılik konkýr jarystarynda 23 medal qanjyǵalady
EKATERINBÝRG. KAZINFORM – Ekaterınbýrg qalasynda at sportynan ótken «Vesna Pobedy» Búkilreseılik konkýr jarystary óz máresine jetti. «Arǵymaq» at-sportyq saýyqtyrý kesheniniń shabandozdary Astananyń namysyn abyroımen qorǵap, júldegerler qatarynan kórindi. Bul týraly Qazaqstannyń at sporty federatsııasy málim etti.
Qatysýshylar 70-ten 130 sm-ge deıingi bıiktiktegi kedergilerdi, sonyń ishinde klassıkalyq marshrýttar men kedergiden sekirý kezeńderin sátti eńserdi. Sportshylar joǵary daıyndyq deńgeıin tanytyp, qyzý básekede barlyǵy 23 júlde jeńip aldy. Qorjynda 12 altyn, 7 kúmis, 4 qola bar.
— Azamat Hasenov «Mýnferı», «Asýan» jáne «Izı» tulparlarymen qatysyp, 4 altyn, 4 kúmis medal jeńip aldy. Jalǵasbek Sýleımenqulov «Lebed» pen «Forvard» tulparlarymen birge 3 altyn, 2 kúmis jáne 1 qola medalǵa ıe boldy. Jas shabandoz Álisher Manar «Artıst» tulparymen 4 altyn, 1 kúmis, Safına Baıgýjına 1 altyn, 2 qola medalǵa ıe boldy. Anel Hasenova men senimdi serigi «Rýsskaıa zvezda» 3-shi oryn — qola medal jeńip aldy, — delingen habarlamada.
Eske sala keteıik, buǵan deıin habarlanǵandaı at sportynan qazaqstandyqtar Tashkentte ótken iri týrnırlerde sátti óner kórsetken bolatyn.