Astanalyq veloshabandoz Haınan týrynyń taǵy bir kezeńinde jeńiske jetti
ASTANA. KAZINFORM – XDS Astana Team veloshabandozy Tomas Sılva 2026 jylǵy Haınan týrynyń tórtinshi kezeńinde ekinshi jeńisine qol jetkizdi, dep habarlaıdy Kazinform.
Lınshýıden Baotınge deıingi 132,7 shaqyrymdyq jarys kezeńi sońǵy shaqyrymda tartysqa toly boldy. Ásirese 2,6 shaqyrymdyq órmeleý kezinde kóshbasshylardyń shaǵyn toby, onyń ishinde Tomas Sılva men Nıkolas Vınokýrov alda júrdi.
Qarsylastardyń birneshe shabýylynan keıin Tomas Sılva máre syzyǵyn birinshi kesip, komandasyna taǵy bir márte jeńis syılady. Ekinshi oryndy Tomas Pesentı (Team Polti VisitMalta), úshinshi oryndy Alessandro Fansellý (MBH Bank CSB Telecom Fort) ıelendi. Azııa týrnıriniń kestesinde kóshbasshy Nıkolas Vınokýrov (kók jeıde) tórtinshi bolyp márege keldi.
– Búgingi jarysta komandama kórsetken qoldaýy úshin alǵys aıtamyn. O basta komanda barlyǵyn tolyq baqylaýda ustady. Joǵaryǵa kóterilgen kezde men jaqsy pozıtsııada boldym, sodan keıin Nıkolaspen birge kóshbasshy topqa endik, - deıdi Haınan týrynyń tórtinshi kezeńinde jeńiske jetken Tomas.
Ol aptap ystyqta jarysý qıyn bolǵanymen, komanda tapsyrmany oıdaǵydaı oryndap shyqqanyn tilge tıek etti.
– Erteń men sary jeıdeni kıemin. Búgingi jetistigim – eń aldymen bizdiń komanda úshin mańyzdy. Sondyqtan bul jeńisti XDS Astana komandasyna, sondaı-aq óz otbasyma jáne elime arnaımyn. Ýrýgvaıda tún ortasy bolǵanymen, otbasym jarysty qarap, meni qoldady. Jalpy esep boıynsha bul nátıjeni saqtap qalýǵa tyrysamyz, - dedi Tomas Sılva.
Aıta keteıik, Tomas Sılva jalpy esepte kósh bastap, sary jeıdeni ıelenip otyr. Al Nıkolas Vınokýrov jalpy esepte 6-orynǵa turaqtady.
Budan buryn velotrekten Azııa chempıonatynda Qazaqstan qorjynynda 11 medal bar ekenin habarlaǵan edik.
