Astanalyq polıtseıler tapanshadan oq atýdan el kýbogyn jeńip aldy
ASTANA. KAZINFORM – Qonaev qalasyndaǵy «Qaısar» polıgonynda IPSC praktıkalyq tapanshamen atýdan Qazaqstan Kýbogy ótti. Komandalyq esepte elordalyq Polıtsııa departamentiniń jyldam qımyldaıtyn arnaıy jasaǵy top jardy.
Praktıkalyq oqý atý sportymen Qazaqstannyń barlyq áskerı mindettileri, arnaıy jasaqtary aınalysady. Jarys halyqaralyq standartqa saı uıymdastyrylǵan, onda tek mergendik emes, taktıkalyq oılaý, jyldam áreket etý jáne qarýdy qaýipsiz meńgerý deńgeıi baǵalandy.
Bul saıysta sporttyq jáne jaýyngerlik daǵdylar damıdy: turý, jatý, tizerleý syndy ár túrli pozıtsııalarda oq atýdy, únemi qozǵalysta bolýdy, eki qolmen de birdeı tapansha ustaýdy shyńdaı túsedi. Óıtkeni urys jaǵdaıynda sarbaz qaı ıyqqa jaraqat alsa da, kez kelgen qolymen qarý ustaı alýy kerek.
Jarysqa Qazaqstannyń túkpir-túkpirinen 207 sportshy qatysqan. Sonyń ishinde «Classic» bóliminde komandalyq esepte Astana Polıtsııa departamentiniń jyldam qımyldaıtyn arnaıy jasaǵy І oryndy ıelendi.
Jeke esep boıynsha da astanalyq jasaqtyń aǵa ınspektorlary – Darhan Jeksembınov, Erlan Bazarbaev, Medet Slamǵazın júldeli І, ІІ jáne ІІІ oryndardy jeńip alǵan.
– Praktıkalyq oq atýda árbir saıys úlken daıyndyqty talap etedi. Belsendi jattyǵýlar jasalady, bastapqyda qarýdy durys ustaý, dáldeý, myltyq tartpasyn úırený men tynys alýdy retteý úshin qarý oqsyz atylady. ıAǵnı munda qarýdy shyǵaryp jaı ǵana shúrippeni basý múmkin emes. Nysanaǵa jyldam ári dáldikpen tıip, kelesi nysanaǵa jetip, ony da qulatý úshin arnaıy qozǵalystar bar. Durys tamaqtaný da úlken ról atqarady. Óıtkeni jyldamdyqty arttyrý kerek. Qansha jerden nysanaǵa dóp tıseń de, sońǵy bolyp kelseń, upaı sanalmaıdy. Márege birinshi kelip, nysanaǵa oq tımese, ol da eseptelmeıdi. Sondyqtan, praktıkalyq atysta jyldamdyq pen dáldikti bólip-jarý qıyn, – deıdi komanda kapıtany Erlan Bazarbaev.
Aıta keteıik, praktıkalyq oq atý kásibı sport retinde ótken ǵasyrdyń 50-jyldary AQSh-ta bastaý aldy. Onda birneshe qarý túrleri – tapansha, vıntovka, bytyraly myltyq qoldanylady.
Halyqaralyq praktıkalyq atý konfederatsııasy (IPSC) 1976 jyly qurylǵan. Qazaqstanda bul sport 2010 jyldary belsendi júrgizile bastady.
Buǵan deıin Sport jáne dene shynyqtyrý isteri komıteti 27 sáýir-3 mamyr aralyǵynda ótetin sport jarystary kestesin jarııalaǵan edi.
