Astanalyq otbasylar «Uly Dala Oıyndary» estafetasyna qatysyp, syılyq uta alady
ASTANA. KAZINFORM — Astanadaǵy «Qazaqstan» jeńil atletıkalyq sport kesheninde Naýryznama onkúndigi aıasynda 20 naýryz — Ulttyq sport kúnine arnalǵan otbasylyq «Uly Dala oıyndary» festıvali uıymdastyrylady, dep habarlaıdy elorda ákimdiginiń resmı saıty.
Estafeta úsh kezeńnen turady. Ár komandada áke, ana jáne 8-10 jas aralyǵyndaǵy balasy bar otbasylar qatysa alady. Komandalardy tirkeý onlaın júzege asyrylady. Ótinimder 20 naýryzǵa deıin +7 775 778 97 25 telefony arqyly qabyldanady.
Uıymdastyrýshylardyń aıtýynsha, bul kúni sport alańynda otbasylyq komandalar — ákeler, analar jáne balalar — ulttyq oıyndarǵa negizdelgen jáne zamanaýı tehnologııalarmen tolyqtyrylǵan túrli synaqtardan ótedi.
— Bul otbasylyq estafetany bıyl ekinshi ret ótkizgeli otyrmyz. Bıylǵy festıvaldiń ereksheligi — is-shara Jasandy ıntellekt jyly aıasynda uıymdastyrylyp otyr. Memleket basshysy Qasym-Jomart Toqaev 2026 jyldy Tsıfrlandyrý jáne jasandy ıntellekt jyly dep jarııalaǵan bolatyn. Osyǵan baılanysty Naýryz merekesin jańa formatta ótkizýdi josparlap otyrmyz. Festıval barysynda qatysýshylar jasandy ıntellekt elementteri qoldanylǵan 3 kezeńnen turatyn jarys kútedi. Ár komanda úsh adamnan — áke, ana jáne bala bolyp quralǵan bolýy kerek. Jalpy qatysýshylar sany shektelgen: barlyǵy — 12 komanda, ıaǵnı 180 adam qatysa alady. Qatysýshylar men jeńimpazdar baǵaly syılyqtarǵa ıe bolady. Qatysý tegin, kórermender úshin de kirý tegin. Barlyq qala turǵyndary men qonaqtardy shaqyramyz, — dedi qalalyq sporttyq is-sharalardy ótkizý dırektsııasy basshysynyń orynbasary Erjigit Óserbaı.
Estafeta qurylymy
I kezeń — ulttyq sport túrleri boıynsha otbasylyq estafeta
Ár komanda músheleri jeke estafetalardan ótedi:
Ákeler estafetasy:
• Sadaq atý — nysanaǵa 90 upaı jınaǵansha;
• Qoshqar kóterý — 5 ret;
• Narqudyq — tańdalǵan salmaqty kóterý;
• Láńgi tebý;
• «Syılyq sandyǵy» — kiltti taýyp, qappen birge márege jetý.
Analar estafetasy:
• Shalquımaıq estafetasy — basyndaǵy tostaǵanmen qashyqtyqty ótý;
• Labırınt — temir sharıkti labırınt arqyly ótkizý;
• Han arqan — saqınalardy tirekterge dál laqtyrý;
• Bes asyq — dástúrli asyq oıyny;
• Úlken qasyq asyq — asyqtardy úlken qasyqpen jınaý.
Balalar estafetasy:
• Asyq atý — sheńberden asyqtardy atý;
• Arqan Board — arqan ústinde skeıtbordpen júrý;
• Kókpar Kids — balalarǵa arnalǵan kókpar oıyny;
• Asyq tabý — nómir boıynsha asyqtardy jınaý;
• Jump with qap — qappen sekirý jarysy.
II kezeń — ınteraktıvti jarystar
AI tehnologııalaryn qoldanatyn zamanaýı synaqtar.
III kezeń — fınal
Arqan tartý boıynsha komandalyq saıys.
Aıta keteıik, Ulttyq sport kúnine oraılastyrylǵan festıvaldi Astana qalasy ákimdiginiń qoldaýymen elordalyq Dene shynyqtyrý jáne sport basqarmasy uıymdastyryp otyr.
Estafeta «Qazaqstan» jeńil atletıka sport kesheni 20 naýryz kúni saǵat 10:00–de bastalady. Kirý tegin.
Budan buryn byltyr naýryznamanyń onkúndigi aıasynda atalyp ótetin Otbasy kúnine oraı elordada «Kóńildi start» atty otbasylyq estafeta ótkenin jazǵanbyz.
