Astanalyq órt sóndirýshiler taktıkalyq oqý-jattyǵý ótkizdi
ASTANA. KAZINFORM – Astanalyq órt sóndirýshiler Jasyl aımaqtaǵy shartty órtti sóndirdi. 23 mamyrda elordalyq TJ departamenti jasyl aımaq aýmaǵynda «Órt-2025» taktıkalyq oqý-jattyǵýyn ótkizdi.
Bul operatsııanyń arnaıy stsenarııi boıynsha qurǵaq jáne ystyq aýa raıynyń saldarynan elordanyń barlyq aýmaǵynda órttiń qaýipti deńgeıi qalyptasady. Demalýǵa kelgen adamdardyń sóndirmeı qaldyryp ketken ot oshaqtarynyń saldarynan qurǵaq shóp janyp, tilsiz jaý ary qaraı orman beldeýine taraı bastaıdy. Qatty jeldiń saldarynan 4 órt oshaǵy paıda bolyp, jaqyn mańdaǵy úılerge taralý qaýpi týyndaǵan. Órt aýmaǵy 5 000 sharshy metrdi qamtydy. Oqý-jattyǵý jıynyna qatysýshylardyń jedel ári úılesimdi is-áreketteriniń arqasynda qyzyl jalyn tolyǵymen sóndirildi.
Shaqyrý ornyna qalanyń shuǵyl qyzmetteri, onyń ishinde TJ jáne Polıtsııa departamentteri, Apattar medıtsınasy ortalyǵynyń dárigerleri, «Astana Ormany» JShS, «Jasyl-Aımaq» RMM, «Zelenstroı» AQ, «Astana Sý Arnasy» MKM jumyldyryldy. Jattyǵýǵa barlyǵy 110 adam, 35 birlik tehnıka jumyldyryldy.
– Jattyǵýdyń basty maqsaty – orman jáne ormandy dala órtterin sóndirý boıynsha oqıǵa kezinde qalanyń shuǵyl qyzmetteri men órt sóndirýshilerdiń ózara is-qımyldaryn pysyqtaý, órt sóndirýshilerdiń kásibı daǵdylaryn jáne daıyndyǵyn arttyrý, - deıdi qalalyq TDJ órt sóndirýdi uıymdastyrý basqarmasynyń bastyǵy Saıat Qajymov.
Aıta keteıik, órtengen qurǵaq shóp ýaqytynda óshirilmese, úlken shyǵynǵa ákep soqtyrýy múmkin. Kóp jaǵdaıda órtengen jerde qurylys nysandary men turǵyn úıler ornalasqan mekender zardap shegedi. Bul oraıda tabıǵı órtterdiń shyǵýyna kóbinese turǵyndardyń salǵyrttyǵy sebep bolady.
Astana qalasy TJD tabıǵat aıasyna shyqqan kezde sóndirilmegen temeki, sirińkelerdi laqtyrmaýdy, ań aýlaýǵa shyqqanda byqsıtyn materıaldardan jasalǵan oq tyǵynyn paıdalanbaýdy, demalatyn jerden keterde otty sýmen sóndirýdi nemese oshaqtyń janýy tolyq toqtaǵanǵa deıin topyraq laqtyrýdy, shyny ydysty jáne synǵan shynyny qaldyrmaý qajettigin eskertedi.
Qazirgi kezde «Órt 2025» taktıkalyq jattyǵý jıyndary respýblıkanyń barlyń óńirinde uıymdastyrylyp jatyr.
Eske salsaq, buǵan deıin Shymkentti iri órtten soń, qara qoıý tútin basqanyn jazǵan edik.