Astanalyq oqýshynyń ekologııalyq jobasy mınıstrlikke usynyldy
ASTANA. KAZINFORM — Elordada mektep qabyrǵasynda júrip-aq halyqaralyq deńgeıde bastamalar kóterip, jahandyq máselelerdi sheshýge atsalysyp júrgen jas óren bar.
№ 71 mektep-lıtseıiniń 10-synyp oqýshysy Aıgerim Jıenbek jaqynda Earth Ambassadors halyqaralyq jastar qozǵalysynyń prezıdenti atandy. Ol ekologııany qorǵaý, halyqaralyq yntymaqtastyqty nyǵaıtý jáne jastar dıplomatııasyn damytý baǵytynda belsendi jumys istep júr.
Oqýshy Jibek Joly telearnasynyń «Búgin.LIVE» baǵdarlamasyna qonaq bolyp kelip, suqbat berdi.
Búginde Aıgerim qatysatyn qozǵalys ekodıplomatııany, jastar dıplomatııasyn damytýǵa baǵyttalǵan. «Jer qornyń» negizi 2014 jyly qalanǵan. Al 2023 jyly osy baǵytta jastar qozǵalysyn qurý ıdeıasy paıda bolypty.
Al Aıgerimniń qoǵamdyq jumystarǵa aralasýyna áleýmettik jelidegi tanystyǵy sebep bolǵan.
— Bári qyzyǵýshylyqtan bastaldy. Aǵylshyn tili kýrsyna barǵan kezde bir qyzben tanystym. Áleýmettik jelide bir-birimizge jazylǵan soń, onyń túrli jobalarǵa qatysyp, qoǵamdyq jumystarda belsendi ekenin baıqadym. Oǵan qyzyǵyp, ózim suradym. Sóıtip, osy jastar qozǵalysyna qosyldym, — deıdi ol.
Jas belsendi «Taza Qazaqstan» aktsııasy aıasynda aǵash otyrǵyzý, senbilik uıymdastyrý jáne mektep oqýshylarymen ekologııalyq is-sharalar ótkizýge de atsalysady. Onyń aıtýynsha, osy jumystarǵa belsendi qatysýy mańyzdy kezdesýlerge de jol ashqan.
— Belsendiligimniń arqasynda Prezıdentimizben birge aǵash otyrǵyzý aktsııasyna qatystym. Bul — men úshin eń áserli estelikterdiń biri. Prezıdentti teledıdardan ǵana kórip júrgen oqýshy retinde ony ómirde kezdestirý erekshe sezim syılady, — deıdi Aıgerim.
Jas órenniń ekologııalyq jobasy júldege ıe boldy
Aıgerim ekologııa taqyrybyndaǵy respýblıkalyq baıqaýda ekinshi oryn alyp, óz jobasyn Ekologııa jáne tabıǵı resýrstar mınıstrligine tanystyrǵan.
— Jobada dekarbonızatsııa máselesi men aǵash otyrǵyzýdyń aýany tazartýdaǵy mańyzy qamtylǵan. Baıqaýǵa qatysýyma synyp jetekshimniń usynysy sebep boldy. Bul jobanyń Ekologııa jáne tabıǵı resýrstar mınıstrligine deıin jetip, tanystyrǵanyma qýanamyn, — dedi ol.
Aıgerimniń bastamalary ekologııamen ǵana shektelmeıdi. Ol portýgal tili men mádenıetin zertteýge qyzyǵatyn jastardy biriktirý úshin arnaıy klýb ashqan.
— Portýgalııa men Brazılııa mádenıetine áleýmettik jeli arqyly qyzyqtym. Olardy zertteı bastaǵanda, basqa jastardyń da qyzyǵýshylyǵy bar ekenin baıqadym. Sodan birge til úırenip, mádenıetti talqylaıtyn orta qurýdy jón kórdim, — deıdi ol.
Qazir Aıgerim tórt til biledi, sonymen qatar qytaı tilin meńgerip júr. Onyń pikirinshe, jastardyń jańa til úırenip, túrli mádenıetti tanyp-bilýi halyqaralyq baılanys ornatýǵa múmkindik beredi.
Jastar ekologııalyq máselelerge beıjaı qaramaıdy
Aıgerim mektep oqýshylarynyń ekologııaǵa qyzyǵýshylyǵy artyp kele jatqanyn aıtady.
— Kóp mektepte ekologııalyq klýbtar jumys isteıdi, al mektep parlamentterinde ekofraktsııalar qurylǵan. Jastar ekologııalyq máselelerdi tereń túsinip, olardy sheshýge ózderi de atsalysyp júr. «Taza Qazaqstan» aktsııasyna qatysýǵa nıetti jastar kóp, — deıdi ol.
Jas belsendi halyqaralyq yntymaqtastyq pen ekologııalyq bastamalarǵa qatysý arqyly qatarlastaryna da úlgi bolýdy kózdeıdi.
Aıta keteıik, jaqynda Qazaqstan jastarynyń búgingi kelbeti jaıly arnaıy materıal jazǵan edik.
