Astanalyq oqýshylar robototehnıkadan halyqaralyq chempıonatta úzdikterdiń qataryna endi
ASTANA. KAZINFORM – Elordada ótken V halyqaralyq «Robotek Grand Tournament Astana 2026» robototehnıka chempıonaty máresine jetip, elordalyq oqýshylar joǵary nátıjelerimen kózge tústi. Bıyl alǵash ret prezıdenttik «TurkTime!» bastamasy aıasynda uıymdastyrylǵan aýqymdy doda túrki áleminiń jas ınjenerlerin bir alańǵa toǵystyrdy, dep habarlaıdy elorda ákimdiginiń resmı saıty.
Halyqaralyq chempıonatqa Qazaqstan, Túrkııa, Ázerbaıjan, Ózbekstan, Qyrǵyzstan, Túrkimenstan jáne Tájikstannan úzdik komandalar qatysyp, 2026 jylǵy týrnır sheteldik qatysýshylar sany boıynsha rekord ornatty. Astana tórinde 45-ten astam halyqaralyq komanda ózara baq synady.
Keıingi 5 jyl ishinde Qazaqstannyń iri IT-bilim berý alańyna aınalǵan «Robotek Grand Tournament Astana 2026» bıyl Tsıfrlandyrý jáne jasandy ıntellekt jyly aıasyndaǵy mańyzdy tehnologııalyq oqıǵalardyń birine aınaldy. Al, chempıonat Qazaqstan Respýblıkasy Oqý-aǵartý mınıstrligi men Astana qalasy ákimdiginiń qoldaýymen ótti. Uıymdastyrýshylar qatarynda «Daryn» respýblıkalyq ǵylymı-praktıkalyq ortalyǵy, «Astana daryny» daryndy jáne talantty balalardy qoldaý ortalyǵy, Nazarbayev University, NU Impact Foundation jáne «Robotek» robototehnıka mektebi bar.
Jarys qorytyndysynda elordalyq oqýshylar birqatar negizgi sanat boıynsha úzdik nátıje kórsetip, halyqaralyq deńgeıdegi básekede Astananyń bilim men tehnologııa ortalyǵy retindegi joǵary deńgeıde dáleldedi.
Atap aıtqanda, «Jetkizýshi robot» sanatynda І oryndy Eralı Amangeldıev pen Qaısar Qýan ıelense, Eskendir Bolathan men Ivan Kramarenko ІІІ orynǵa turaqtady.
«Matrix League of Mecha-clash» sanatynda Gleb Lıstopadnıı, Nurdáýlet Qýandyq jáne Amandos Áýbákirov quramasy І oryn jeńip aldy. Sonymen qatar Rýstam Anas pen Oljas Shalqarbekov te chempıon atandy. Erkebulan Zulfıkar men Alen Beısenbaev, sondaı-aq Artem Tshaı men Sanjar Jumabaı komandalary ІІ oryn ıegerleri atandy.
«Mergen» sanatynda Ernazar Ersaıyn men Sadýaqas Aqmurat kúmis júldege ıe boldy. Al «RoboBasketbol» baǵyty boıynsha Aldııar Utybaev pen Aqnıet Qaljan ІІ oryndy ıelendi.
«Matrix Innovation Challenge» sanatynda Azamat Adaıuly, Zere Ordabaı jáne Murat Álimhan ІІ oryn alsa, Nuraı Qadirqulova, Erkenaz Qadyrbekova jáne Sabına Shýlezbaeva ІІІ orynǵa ıe boldy.
Arnaıy nomınatsııalar boıynsha da astanalyq qatysýshylar joǵary baǵalandy. «Úzdik qyzdar komandasy» nomınatsııasy Jibek Don men Aızere Nurushqa tabystaldy. Al «Mecha-clash» arnaıy nomınatsııasynyń jeńimpazdary Sofııa Aresheva men Adelıa Qaıyrbekova boldy.
Sonymen qatar Energo University bilim grantyn Azamat Adaıuly ıelendi.
Chempıonattyń basty jetistikteriniń biri – jalpykomandalyq esep boıynsha «El Kýbogynyń» Astana qalasyna buıyrýy boldy.
Budan buryn habarlaǵanymyzdaı, qazaqstandyq oqýshylar Grekııada ótken halyqaralyq robototehnıka chempıonatynda júldeger atandy.
