Astanalyq oqýshylar kún energııasymen jumys isteıtin eko-sýburqaq oılap tapty
ASTANA. KAZINFORM – Astana qalasyndaǵy Álimhan Ermekov atyndaǵy №38 mektep-lıtseıiniń jazǵy etnolagerinde erekshe ekologııalyq joba tanystyryldy. Oqýshylardyń tabıǵatty qorǵaýǵa baǵyttalǵan tyń ıdeıasy – «Eko-fontan» jobasy kópshiliktiń qyzyǵýshylyǵyn týdyrdy, dep habarlaıdy elorda ákimdiginiń resmı saıty.
Jas ónertapqysh Ánel Kenjehannyń sózinshe, bul bastama – jas urpaqtyń tabıǵatty qorǵaýǵa degen jaýapkershiligin arttyratyn naqty áreket. Ol sondaı-aq osyndaı jobalar arqyly elordalyq oqýshylar qorshaǵan ortany saqtaýǵa, jańashyl oılaý qabiletterin damytýǵa jáne turaqty damýǵa óz úlesterin qosyp jatqanyn aıtty.
– Eko-sýburqaq – tek tehnıkalyq jańalyq emes, bul – tabıǵatpen úılesimdi ómir súrýdi nasıhattaıtyn tárbıe quraly. Mektep aýlasynda, saıabaqtarda nemese qoǵamdyq oryndarda qoldanýǵa yńǵaıly mundaı jobalar elordanyń ekologııalyq kelbetin jaqsartýǵa kóp kómegin tıgizedi. Sýburqaq arqyly balalar ekologııany tek teorııalyq emes, praktıkalyq túrde meńgerip, kún energııasynyń tıimdiligin óz kózderimen kóre alady, - deıdi Ánel Kenjehan.
Oqýshylar eko-sýburqaqtyń mańyzyn úsh baǵytpen negizdedi: sýdy únemdeý, energııany tıimdi paıdalaný, ekologııalyq mádenıetti qalyptastyrý.
Jobanyń negizgi maqsaty – sýdy jáne energııany tıimdi paıdalaný arqyly qorshaǵan ortany qorǵaý. Al erekshe týyndynyń qurylymyna kelsek, kún panelderi arqyly qýat alatyn sorǵy júıesi sýdy qaıta aınaldyrady, sý ysyrapsyz paıdalanylyp, qaıta óńdeledi, jasandy aǵashtar, sándik ósimdikter men tastar arqyly tabıǵı kórinis qalyptasady. Sýburqaq tabıǵı resýrstardy únemdep qana qoımaı, qalalyq ortaǵa ekologııalyq jáne estetıkalyq qundylyq qosady.
Eske sala keteıik, buǵan deıin Pavlodardaǵy sýburqaqtardyń basym bóligi jóndeýdi qajet etetinin jazǵan edik.