Astanalyq oqýshy zaǵıp jandarǵa arnalǵan aqyldy kózildirik oılap tapty

ASTANA. KAZINFORM — Astanadaǵy Qoshke Kemeńgeruly atyndaǵy № 49 mektep-gımnazııasynyń 10 «A» synyp oqýshysy Qýandyq Ámirhan erekshe jobasyn tanystyrdy. Ol kórý qabileti nashar jáne múlde kórmeıtin jandarǵa arnalǵan aqyldy kózildirik jasap shyǵardy, dep habarlaıdy elorda ákimdigi.

— Jas ónertapqyshtyń bul jobasy kózi nashar kóretin adamdarǵa kúndelikti ómirde kóshede erkin qozǵalyp, túrli kedergilerden saqtanýǵa múmkindik beredi. Aqyldy kózildiriktiń basty ereksheligi — adamnyń aldynda bir metr qashyqtyqtan bastap kedergi paıda bolǵanda, aldyn ala qazaq tilinde «Saqtanyńyz, aldyńyzda kedergi!» degen daýystyq eskertý jasaıdy, — delingen ákimdik taratqan aqparatta.

Qýandyq Ámirhan bul kózildirikti zaǵıp jandardyń qaýipsizdigin qamtamasyz etý maqsatynda qurastyrǵanyn aıtady. Aldaǵy ýaqytta ol jumystyń aýqymyn keńeıtip, basqa da nusqamalardy engizýdi kózdep otyr.

Vedomstvo atap ótkendeı, bul bastama — jas ónertapqyshtyń ǵylym men tehnologııa salasyna degen qyzyǵýshylyǵynyń nátıjesi ǵana emes, sonymen qatar áleýmettik jaýapkershilik pen janashyrlyqtyń úlgisi. Aqyldy kózildirik áleýmettik mańyzy zor jańalyq retinde qoǵamnyń qoldaýyna ıe bolary sózsiz. Joba zaǵıp jandardyń ómir súrý sapasyn arttyryp, olardyń óz betimen qozǵalýyna úlken septigin tıgizbek.

Osydan buryn elordada oqýshylar 400-ge jýyq qaqpaqtan Qazaqstan kartasyn jasaǵanyn jazǵan edik.