Astanalyq oqýshy ósimdikten ekologııalyq qaǵaz jasap, patent aldy
ASTANA. KAZINFORM — Astanalyq oqýshy Zaına Júsipbekova túıejapyraq pen qalaqaıdan tolyq ydyraıtyn ekologııalyq qaǵaz jasaý jobasyn ázirlep, «Qazpatentten» eki patent aldy. Qazir jas zertteýshi jobany kommertsııalandyrý baǵytynda jumys istep júr jáne emdik balshyqtardyń tsıfrlyq kartasyn ázirlep, Alakól sýyn medıtsınada paıdalaný múmkindigin zerttep jatyr.
Plastık pen aǵashtan óndiriletin qaǵazǵa balama izdeý búginde álemdik ǵylymnyń mańyzdy baǵyttarynyń birine aınaldy. Osy máseleni nazarǵa alǵan Z. Júsipbekova túıejapyraq pen qalaqaı negizinde bıologııalyq turǵydan tolyq ydyraıtyn ekologııalyq materıal ázirleýdi qolǵa alǵan.
Jobanyń ereksheligi — materıaldyń bir ǵana fýnktsııamen shektelmeýinde. Ony ekologııalyq qaptama retinde paıdalanýmen qatar, kosmetıkalyq baǵytta da qoldanýǵa bolady. Atap aıtqanda, tabıǵı tonık, betke arnalǵan maska, skrab, applıkatsııalyq materıal nemese shash kútimine arnalǵan qural retinde paıdalaný múmkindigi qarastyrylǵan.
Qazirgi ýaqytta jas zertteýshi ósimdik negizindegi shash kútimine arnalǵan kontsentratty kommertsııalandyrý baǵytyndaǵy bıznes-jobasyn damytyp keledi. Bul bastama Pavlodar óńiriniń jetekshi ǵalymdarynyń qyzyǵýshylyǵyn týǵyzyp, búginde birlesken zertteý jumystary júrgizilip jatyr.
— Jobanyń basty maqsaty — tabıǵı resýrstardy qaldyqsyz paıdalaný men ekologııalyq qaýipsiz ónimder jasaý. Ósimdikterdiń quramyndaǵy paıdaly komponentterdi turmysta jáne kosmetologııada qoldaný múmkindikterin zerttep kelemin, — deıdi Zaına Júsipbekova.
Ekologııa men bıotehnologııa baǵytyndaǵy izdenistermen qatar, jas zertteýshi Qazaqstandaǵy emdik balshyq qorlaryn ǵylymı turǵyda júıeleýge arnalǵan jobany qolǵa alǵan.
Ol Qostanaı, Aqmola jáne Pavlodar oblystaryndaǵy tolyq zerttelmegen emdik balshyqtardyń fızıka-hımııalyq jáne balneologııalyq qasıetterin zerdelep, elimizdegi barlyq emdik balshyq ken oryndaryn qamtıtyn tsıfrlyq aqparattyq platforma ázirleýdi josparlap otyr. Interaktıvti kartada árbir ken ornynyń hımııalyq quramy, emdik qasıetteri, qoldaný kórsetkishteri men qarsy kórsetilimderi ǵylymı derekter negizinde usynylady.
Buǵan deıin Zaına Júsipbekovanyń alǵashqy ǵylymı izdenisteri Alakól kóliniń mıneraldy sýyn zertteýden bastalǵan edi. Ol kól sýynyń fızıka-hımııalyq quramyn taldap, arnaıy tazartý tehnologııalary qoldanylǵan jaǵdaıda muryn qýysyn shaıýǵa arnalǵan nazaldy eritindi óndirýge paıdalanýǵa bolatynyn ǵylymı negizdep, usynysyn Úkimetke joldaǵan.
Densaýlyq saqtaý mınıstrligi resmı jaýabynda bastamanyń ózektiligin atap ótip, alaıda medıtsınalyq preparat óndirisi úshin sýdy qosymsha tazartý tehnologııalaryn ázirleý qajettigin málimdegen.
Aıta keteıik, Memleket basshysy Qasym-Jomart Toqaev Parlament palatalarynyń birlesken otyrysynda ǵylym salasyn damytýǵa basa nazar aýdarý qajettigin aıtqan edi.
Sondaı-aq Qazaqstan ǵylymdy basqarýdyń jańa úlgisine kóshetinin jazǵanbyz.
