Astanalyq oqýshy Earth Ambassadors halyqaralyq jastar qozǵalysynyń prezıdenti atandy
ASTANA. KAZINFORM — Astanadaǵy №71 mektep-lıtseıiniń 10-synyp oqýshysy Aıgerim Jıenbek sońǵy eki jyl boıy ekologııa, jastar dıplomatııasy, halyqaralyq yntymaqtastyq jáne bilim berý salalaryndaǵy jobalarǵa belsendi qatysyp keledi, dep habarlaıdy elorda ákimdiginiń resmı saıty.
Jaqynda ol Earth Ambassadors («Jer ambassadorlary») halyqaralyq jastar qozǵalysynyń prezıdenti atandy.
Aıgerim qoǵamdyq qyzmetin segizinshi synypta bastaǵan. Alǵashynda túrli is-sharalardy uıymdastyrýǵa kómektesip, keıin qozǵalystyń halyqaralyq qatynastar bóliminiń úılestirýshisi bolǵan. Osy kezeńde oqýshy Estonııa, Birikken Arab Ámirlikteri jáne Brazılııa elshilikterimen baılanysty is-sharalarǵa qatysyp, halyqaralyq yntymaqtastyqty damytýǵa úles qosqan.
Sonymen qatar Aıgerim portýgal tili men mádenıetin dáripteý maqsatynda til klýbyn qurǵan. Sondaı-aq genderlik teńdik pen áıelder quqyǵyn qorǵaýǵa arnalǵan jeke is-shara uıymdastyrǵan.
— Oqýshynyń ekologııa salasynda da jetistikteri bar. Aıgerim Pro Eco respýblıkalyq baıqaýynda ekinshi oryn alyp, óz jobasyn Qazaqstannyń Ekologııa mınıstrine tanystyrǵan. Budan bólek, «Taza Qazaqstan» bastamasy aıasynda aǵash otyrǵyzý is-sharalaryna, sondaı-aq dıplomatııalyq ókildiktermen, halyqaralyq uıymdarmen jáne bıznes ókilderimen birlesken ekologııalyq jobalarǵa qatysqan, — delingen habarlamada.
Qyrkúıek aıynda Aıgerim qozǵalystyń prezıdenti bolyp taǵaıyndaldy. Qazir jas kóshbasshy jastar bastamalaryn qoldaýǵa, halyqaralyq baılanystardy nyǵaıtýǵa jáne ekologııalyq mádenıetti damytýǵa erekshe kóńil bólip júr.
Aıgerimniń tájirıbesi oqýshylardyń mektep qabyrǵasynda júrip-aq qoǵamdyq bastamalarǵa belsendi qatysyp, halyqaralyq yntymaqtastyq pen turaqty damýǵa úles qosa alatynyn kórsetip otyr.
Buǵan deıin Nobel laýreattarynyń qoltańbasy bar teleskop astanalyq oqýshylarǵa syıǵa berilgenin jazǵanbyz.
