Astanalyq oqýshy 1 mınýtta kýbık rýbık jınaıtyn robot jasap shyǵardy

ASTANA. KAZINFORM — Arnaıy sensorlar arqyly kýbıktiń qyrlaryn skanerlep, tústerin anyqtaıtyn robot alynǵan derekterdi taldap, eń tıimdi algorıtmdi tańdap, Kýbık Rýbıkti jyldam ári dál jınaıdy, , dep habarlaıdy elorda ákimdiginiń resmı saıty.

Astana qalasyndaǵy Álimhan Ermekov atyndaǵy № 38 mektep-lıtseıiniń 7-synyp oqýshysy Shahnazar Kamalov bir mınýt ishinde «Kýbık Rýbıkti» tolyqtaı avtomatty túrde jınaı alatyn aqyldy robot jobasyn kópshilikke tanystyrdy.

— Joba LEGO Mindstorms EV3 konstrýktory negizinde qurastyrylǵan. Robottyń basty mindeti — kúrdeli logıkalyq tapsyrma retinde tanylǵan Kýbık Rýbıkti jyldam ári dál jınaý. Arnaıy sensorlar kýbıktiń ár qyryn skanerlep, tústerdi anyqtaıdy. Alynǵan aqparatty taldaý nátıjesinde robot eń tıimdi algorıtmdi tańdap, jınaý protsesin oryndap shyǵady. Baǵdarlamalaý EV3 Classroom platformasynda Python tilinde júzege asyrylǵan. Bul oqýshyǵa algorıtmdik oılaý daǵdylaryn damytýǵa, ınjenerlik esepterdi sheshýge, sondaı-aq robot qozǵalysynyń ár buryshy men aınalýyn dáldikpen basqarýǵa múmkindik bergen, — delingen ákimdik taratqan habarlamada.

Qazir robototehnıka — jasandy ıntellekt pen ınjenerııa toǵysqan, qarqyndy damyp kele jatqan mańyzdy baǵyttardyń biri. Osyndaı jobalar oqýshylardyń tehnıkalyq saýattylyǵyn arttyryp qana qoımaı, olardyń shyǵarmashylyq qabiletin shyńdap, ǵylym men tehnologııaǵa degen qyzyǵýshylyǵyn kúsheıtedi.

Shahnazardyń jumysy — jas talaptyń tabandylyǵy men izdenisiniń aıqyn kórinisi. Joba onyń baǵdarlamalaý men tehnıkalyq modeldeýge degen qyzyǵýshylyǵyn arttyryp, logıkalyq ári analıtıkalyq oılaýyn damytýǵa úlken úles qosty. Bolashaqta bul robotty ári qaraı jetildirý arqyly oqýshynyń jańa, odan da kúrdeli mehanızmder jasaýǵa múmkindigi zor.

Budan buryn Abaı oblysynyń oqýshysy aýany ylǵaldandyratyn robot oılap tapqany habarlanǵan edi.