Astanalyq muǵalimderge kásibı merekesinde syılyq jasaýǵa tyıym salyndy

Astana qalasynyń bilim basqarmasy bilim berý uıymdarynyń ata-analardan syı-sııapat alýyna tyıym salatyn buıryq shyǵardy, dep habarlaıdy QazAqparat.

«Sybaılas jemqorlyqqa qarsy is-qımyl týraly zańynyń 9-babyna sáıkes, bilim berý uıymdarynyń basshylarynyń ata-analardan jóndeý jumystaryn júrgizýge, qural-jabdyqtar men jıhaz satyp alýǵa, pedagogıkalyq ujymǵa syılyq berýge, bilim berý uıymdaryn attestatsııalaýǵa, merekelik is-sharalarǵa jáne basqa da maqsattarǵa aqsha jınaýyna, sondaı-aq syılyq qabyldaýǵa úzildi-kesildi tyıym salynsyn. Pedagogıkalyq ujym jáne ana-analar komıtetiniń músheleri arasynda mektep pen synyp qajettiligine, merekelik is-sharaǵa zańsyz aqsha jınaý máselesi boıynsha túsindirý jumysyn júrgizsin», — dep jazylǵan buıryqta.

Sondaı-aq, bilim berý uıymdaryna ata-analardan zańsyz aqsha jınaýǵa jol bergen synyp jetekshilerine, muǵalimder men tárbıeshilerge shara qoldaný buıyrylǵan.

«Bilim berý uıymdary ata-analardan zańsyz aqsha jınaýǵa jol bermeý týraly buıryq shyǵarsyn jáne ony ujymǵa tanystyrsyn. Osy buıryq oryndalmaǵan jaǵdaıda bilim mekemeleriniń basshylaryna laýazymynan bosatýǵa deıin qatań tártiptik sharalar qoldanylsyn», — dep buıryq shyǵardy elordalyq bilim basqarmasynyń basshysy Qasymhan Senǵazıev.