Astanalyq mektepte oqýshy eki synyptasyna pyshaq ala júgirdi
ASTANA. KAZINFORM — Elordadaǵy mektepterdiń birinde 11-synyp oqýshysy sýyq qarý alyp kelip, eki synyptasyna shabýyl jasaǵan. Oqıǵaǵa qatysty polıtsııa qylmystyq is qozǵady.
Astana qalalyq Polıtsııa departamentiniń málimetinshe, zardap shekken eki oqýshyǵa medıtsınalyq kómek kórsetilgen. Qazir olardyń ómiri men densaýlyǵyna qaýip tónip turǵan joq.
— Oqıǵaǵa qatysy bar kámeletke tolmaǵan jasóspirim profılaktıkalyq esepke alynyp, Psıhıkalyq densaýlyq ortalyǵynyń mamandaryna jiberildi. Al onyń zańdy ókilderi balany tárbıeleý jónindegi mindetterin tıisinshe oryndamaǵany úshin jaýaptylyqqa tartyldy, — dep habarlady Astana qalalyq Polıtsııa departamentiniń baspasóz hatshysy.
Polıtsııa málimetinshe, oqıǵanyń sebepteri men oǵan túrtki bolǵan mán-jaılardy anyqtaý jumystary jalǵasyp jatyr. Sonymen qatar Bilim basqarmasy men Kámeletke tolmaǵandardyń isteri jónindegi komıssııaǵa tıisti usynystar engizilgen.
Sondaı-aq tergeý barysynda mektep qaýipsizdigine jaýapty kúzet uıymynyń áreketine quqyqtyq baǵa berilmek.
— Qazirgi ýaqytta sotqa deıingi tergeý amaldary jalǵasyp jatyr. Іstiń múddesine baılanysty ózge aqparat jarııalanbaıdy, — dep qorytyndylady Astana qalalyq Polıtsııa departamenti.
Aıta keteıik, Atyraýda mektep oqýshysyn pyshaqtaǵan jasóspirim 15 jylǵa sottaldy.