Astanalyq mektep oqýshylary qarttar men dárigerlerge kómektesetin JI-robottar oılap tapty
ASTANA. KAZINFORM – Elordada ótken halyqaralyq «Robotek Grand Tournament 2026» chempıonatynda Astana qalasynyń namysyn qorǵap, júldeli ekinshi oryn men JOO grantyn ıelengen №117 mektep pen №8 mektep-lıtseıiniń qurama komandasy óz jobalarynyń ereksheligimen Jibek Joly telearnasynyń «Búgin.LIVE» baǵdarlamasynda bólisti.
Jarysqa qatarynan úsh jyl qatysyp, alǵashqy jyly tek qatysýshy sertıfıkatymen shektelgen komanda úshin bıylǵy maýsym naǵyz oljaly kezeń boldy. Komanda jetekshisi, ınformatıka pániniń muǵalimi Erkejan Qýandyqqyzynyń aıtýynsha, bul tabystyń artynda úlken tájirıbe men balalardyń shyǵarmashylyq izdenisi jatyr.
– Toptyq kezeńde ekinshi oryn alyp, oqýshymyz grant ıelendi. Bizdiń qurastyrǵan qaı robotymyzdy alsaq ta, baǵdarlamalaý kezinde de, datchıktermen jumys istegende de tolyqtaı jasandy ıntellekt negizinde jumys isteıdi. Sondaı-aq tikeleı efırge shyǵa alatyn, aldyndaǵy zatty tanyp, habarlama bere alatyn kameralary bar, – deıdi ol.
Chempıonat barysynda erekshe kózge túsip, ýnıversıtetke oqýǵa túsý grantyn jeńip alǵan 11-synyp oqýshysy Azamat Adaıuly óziniń jobasyn tolyǵymen jalǵyzbasty jáne densaýlyǵy álsiz qart adamdarǵa kómektesýge arnaǵan.
– Maǵan grant berilgen kezde qýanyshymda shek bolmady. Men usynǵan joba qart adamdarǵa kómektesýge negizdelgen. Robot adamnyń qasynda kómekshi rólin atqarady. Ony kerek jerine aparyp, kedergilerden qorǵaıdy, arnaıy kamera júıesi arqyly jaıaý júrginshiler jolynan aman-esen ótkizedi. Maǵan jarysta sábılerdiń tynys alýyn, temperatýrasyn ólshep, besikti ózi terbetetin qarsylasymnyń da jobasy qatty unady, – deıdi Azamat Adaıuly.
Al 10-synyp oqýshysy Nuraı Qadyrqulovanyń ıdeıasy otandyq medıtsına salasyndaǵy kadr tapshylyǵy men kezek máselesin sheshýge arnalǵan eken. Onyń JI-assıstenti dárigerlerdiń altyn ýaqytyn únemdeýge múmkindik beredi.
– Qalamyzda aýrýhanalar az, kóp adamdar der kezinde kómek ala almaı jatady. Bizdiń joba eki robottan turady: birinshisi patsıenttiń temperatýrasyn, ylǵaldylyǵyn, kózdiń jasaýraýyn tekserip, dıagnostıka jasaıdy da, aqparatty telefondaǵy qosymshaǵa jiberedi. Dáriger emdelýshi kirgende onyń shaǵymyn daıyn bilip otyrady. Bul robot tipti karantın aımaqtarǵa kirip te jumys isteı alady. Al ekinshi robot dári-dármek jetkizýshi qyzmetin atqarady, – dedi jas óren.
Sala mamany retinde ustaz Erkejan Qýandyqqyzy bul baǵyttyń tek baǵdarlamalaýmen shektelmeıtinin aıtady.
– Robototehnıka tek qana IT salasynda bolady dep oılamaımyn. Ol balany shyǵarmashyl bolýǵa, qaı salada bolsyn jumys isteýine múmkindik beredi. Sebebi jobany jasaý men qurastyrý – tikeleı shyǵarmashylyq jumys, – dep túıindedi jetekshisi Erkejan Qýandyqqyzy.
Eske sala keteiıik, «Robotek Grand Tournament» – elimizdegi mektep oqýshylary arasynda robototehnıka men ınjenerııany damytýǵa baǵyttalǵan eń iri halyqaralyq dodalardyń biri.
Bıylǵy jarysqa osy jarystan astanalyq oqýshylarymyz júldeli oryndardy ıelenip, úzdikterdiń qataryna engen bolatyn.
