Astanalyq qutqarýshylar sý qursaýynda qalǵan kólikterdi shyǵaryp jatyr
ASTANA. KAZINFORM — Astanada nóser jaýynnan keıin sý basqan ýchaskelerde avarııalyq-qutqarý jáne kezek kúttirmeıtin jumystar jalǵasyp jatyr, dep habarlaıdy TJM baspasóz qyzmeti.
Tótenshe jaǵdaılar mınıstrliginiń bólimsheleri qala qyzmetterimen birlesip elordanyń birqatar aýdanynda sý tasqynynyń saldaryn joıý jumystaryn júrgizýge kiristi.
— Qutqarýshylar sý basqan jol ýchaskelerinde qalyp qoıǵan jeńil avtokólikterdi evakýatsııalap, qaýipsiz jerge súırep shyǵarýda. Sondaı-aq turǵyndarǵa kólikterden shyǵýǵa jáne qaýipsiz jerge jetýge kómek kórsetip, jol qozǵalysynyń qaýipsizdigin qamtamasyz etip jatyr, — delingen habarlamada.
TJM avarııalyq-qutqarý jáne kezek kúttirmeıtin jumystardyń jalǵasyp jatqanyn habarlady.
Vedomstvo elorda turǵyndary men qonaqtaryn qaýipsizdik sharalaryn saqtaýǵa, asa qajet bolmasa sý basqan joldarǵa shyqpaýǵa jáne tek resmı aqparatqa súıenýge shaqyrdy.
Osyǵan deıin nóser jaýyp, shahar kóshelerin sý alýyna baılanysty elordanyń kommýnaldyq qyzmetteri kúsheıtilgen rejımde jumys istep jatqanyn jazǵanbyz.
Budan bólek nóser kezinde Tarlan Astana jelisi stantsııalarynyń birinde tóbeden sý aqqany belgili boldy.
