Astanalyq kıberpolıtseıler qarııanyń 39 mln teńgesin alaıaqtardan saqtap qaldy

ASTANA. KAZINFORM – Elordada polıtseıler alaıaqtar urlaǵan 39 mıllıon teńgeni zeınetkerge qaıtardy.

Astana qalasy polıtsııa departamentiniń kıberqylmysqa qarsy kúres basqarmasy qyzmetkerleri ınternet-alaıaqtyqtyń iri deregin áshkerelep, jábirlenýshi 87 jastaǵy zeınetkerge urlanǵan 39 mıllıon teńgesin qaıtaryp berdi.

Oqıǵa bıyl tamyz aıynda bolǵan. Belgisiz adamdar messendjer arqyly zeınetkermen baılanysyp, ózderin polıtsııa men Ulttyq banktiń qyzmetkerleri retinde tanystyrǵan. Olar zeınetkerge «páterińizdi bóten adamdar óz atyna rásimdep, satýǵa shyǵardy» dep sendirip, múlkin saqtaý úshin páterin ózi satyp, qarajatty «qaýipsiz esepshotqa» aýdarýǵa shaqyrǵan.

Alaıaqtar zeınetkerdi Іshki ister mınıstrligi men Ulttyq bank «qylmyskerlerdi ustaýǵa baǵyttalǵan qupııa operatsııa júrgizip jatyr» dep ılandyryp, bul týraly eshkimge aıtpaýyn qatań eskertken. Olardyń aıtqanyn oryndaǵan er adam rıeltorlyq kompanııa arqyly páterin satyp, 39 mıllıon teńgeni kýrerge tapsyrǵan. Atalǵan derek boıynsha Qylmystyq kodekstiń 190-baby (Alaıaqtyq) boıynsha sotqa deıingi tergeý bastaldy.

- Jedel izdestirý is-sharalary barysynda polıtseıler qylmysqa qatysy bar 23 jastaǵy er adamnyń jeke basyn anyqtap, ony ustady. Tekserý kezinde kúdiktiden 39 mıllıon teńge tabylyp, tárkilendi. Qazirgi ýaqytta ustalǵan azamat Astana qalasy polıtsııa departamentiniń ýaqytsha ustaý ızolıatoryna qamaldy. Tárkilengen qarajat ıesine qaıtaryldy.

Jyl basynan beri elorda aýmaǵynda úsh myńnan astam ınternet-alaıaqtyq deregi tirkelgen, - dep jazdy ІІM-nen.

Polıtseılerdiń aıtýynsha, mundaı qylmystardyń basty nysanasy — 50 jastan asqan azamattar. Sebebi olar kóbine qarjylyq saýattylyqtyń tómendiginen alaıaqtardyń qurbanyna aınalady. Quqyq qorǵaý organdary azamattardy saq bolýǵa jáne beıtanys adamdardyń qońyraýlaryna senbeýge shaqyrady.

Polıtsııa qyzmetkerleri eshqashan múlikti satýdy, nesıe rásimdeýdi nemese aqshany «qaýipsiz esepshotqa» aýdarýdy suramaıdy. Osyndaı mazmundaǵy qońyraý túsken jaǵdaıda áńgimeni dereý toqtatyp, jaqyn mańdaǵy polıtsııa bólimshesine habarlasý qajet.

Aıta keteıik, alaıaqtar Memlekettik kirister komıtetiniń ókili bolyp habarlasyp júr.