Astanalyq kelinshek egiz balalarynan keıin úshem tapty

ASTANA. KAZINFORM – Elordanyń bıylǵy alǵashqy úshemi №2 qalalyq kópsalalyq aýrýhanada dúnıege keldi. 25 jastaǵy Ajar Qabıtova tuńǵysh qyzy men egiz balalarynan keıin birden úsh uldy dúnıege ákeldi. Osylaısha, jas otbasy 6 balanyń ata-anasy boldy. 

«Balalardyń atyn áli qoımadyq. Ázirge Ámire, Álıhan, Ámirhan dep oılap otyrmyz. Bes kún dárigerler qaraýynda boldyq, bári jaqsy. Erteń perzenthanadan shyǵamyz», - dedi Ajar KAZINFORM tilshisine bergen suhbatynda.

Ajar Qabıtova – Semeı qalasynyń týmasy. Astana qalasynda Qazaq memlekettik zań ýnıversıtetinde bilim alǵan, mamandyǵy – zańger. 2020 jyly tuńǵysh qyzyn, 2022 jyly – egiz ul men qyzyn bosanǵan.

Al 18 qańtar kúni júktiliktiń 34-aptasynda kesir tiligi arqyly úshemder týǵan. Úsh uldyń salmaǵy – 2 300, 2 550 3 000 gramm.

«Perınataldyq ortalyqtyń mamandary men dárigerlerine alǵys aıtamyn. Ómirimniń osy mańyzdy sátinde sizderdiń qamqorlyqtaryńyz, jylýlyqtaryńyz jáne kásibıligińiz senimdilik pen qaýipsizdik atmosferasyn qurdy. Jańa ómirdiń bastalýyna qosqan úlesterińiz úshin rahmet!», - dep jazdy Ajar áleýmettik jelidegi paraqshasynda. 

Sondaı-aq jas ana kómekshi men bala kútýshi almaıtynyn, barlyq balaǵa ózi qaraıtynyn jazǵan.