Astanalyq dárigerler ata-analarǵa eskertý jasady
ASTANA. KAZINFORM – Jaz mezgilinde balalardyń terezeden qulaý derekteri kóbeıetindikten, elordalyq dárigerler ata-analardy qaýipsizdik sharalaryn qatań saqtaýǵa shaqyrdy, dep habarlaıdy Astana qalasy ákimdiginiń resmı saıty.
Mamandardyń aıtýynsha, mundaı oqıǵalardyń basym bóliginiń aldyn alýǵa bolady. Alaıda eresekterdiń bir sátke ǵana nazaryn basqa jaqqa aýdarýy qaıǵyly jaǵdaıǵa ákelýi múmkin.
– Mundaı oqıǵalardyń basym bóliginiń aldyn alýǵa bolatyn edi. Qaıǵyly jaǵdaıǵa eresek adamnyń telefon qońyraýyna alańdaýy, úı sharýasymen aınalysýy nemese basqa bólmege shyǵyp ketýi sııaqty bir mınýttyń ózi jetkilikti, – delingen úndeýde.
Dárigerlerdiń aıtýynsha, terezeden qulap zardap shegetinderdiń basym bóligi – bir jastan alty jasqa deıingi balalar. Olar tereze aldyna ońaı shyǵa alǵanymen, bıiktiktiń qanshalyqty qaýipti ekenin tolyq túsine bermeıdi.
Mamandar moskıt torynyń balany qorǵaıdy degen túsiniktiń qate ekenin erekshe atap ótti.
– Moskıt tory qaýipsizdik quraly emes. Ol balanyń salmaǵyna shydamaıdy jáne az ǵana qysymnyń ózinde balamen birge qulap ketedi. Ókinishke qaraı, kóptegen qaıǵyly jaǵdaıdyń sebebi de osy, – dedi dáriger.
Dárigerlerdiń málimetinshe, az ǵana bıiktikten qulaýdyń ózi bas-mı jaraqatyna, omyrtqa men aıaq-qol súıekteriniń synýyna, ishki aǵzalardyń zaqymdanýyna ákelýi múmkin. Kóp jaǵdaıda balalarǵa kúrdeli operatsııa jasalyp, uzaq ýaqyt ońaltýdan ótýge týra keledi.
Jaz mezgili bastalǵannan beri Astanada medıtsınalyq uıymdar, tótenshe jaǵdaılar qyzmeti, polıtsııa jáne bilim berý uıymdary halyq arasynda aqparattyq-túsindirý jumystaryn kúsheıtken. Mamandar profılaktıkalyq reıdter ótkizip, jadynamalar taratyp, turǵyndarǵa qaýipsizdik erejelerin túsindirip jatyr.
– Ata-analardy qaýipsizdik máselesin keıinge qaldyrmaýǵa shaqyramyz. Búgin-aq terezelerińizde ashylýdy shekteıtin qurylǵylardyń bar-joǵyn, tereze aldyndaǵy jıhazdyń alynyp tastalǵanyn jáne balanyń terezeni ózdiginen asha almaıtynyn tekserińiz. Osyndaı qarapaıym sharalar balanyń ómirin saqtap qalýy múmkin, – dep atap ótti dárigerler.
Mamandar ata-analarǵa terezelerge arnaıy qaýipsizdik bekitkishterin ornatýdy, balalarǵa arnalǵan qulyptardy paıdalanýdy jáne kishkentaı balalardy ashyq terezeniń janynda eshqashan qaraýsyz qaldyrmaýdy usyndy.
Aıta keteıik, Astanada jyl basynan beri 25 bala terezeden qulaǵan.
