Astanalyq dáriger JRVI-ǵa baılanysty ata-analarǵa úndeý jasady

ASTANA. KAZINFORM – Astanada kúz-qys maýsymyna tán jedel respıratorlyq vırýstyq ınfektsııalar (JRVI) kezeńi bastaldy. Qalada syrqattanýshylar sany birtindep ósip keledi, dep habarlaıdy elorda ákimdiginiń resmı saıty.

Bul jyl saıyn qaıtalanatyn tabıǵı epıdemıologııalyq kezeń bolǵanymen, dárigerler ata-analarǵa saqtyqty kúsheıtýdi eskertýde. №3 kópbeıindi qalalyq Balalar aýrýhanasynyń bólim meńgerýshisi Abaıdahar Talantuly qazirgi jaǵdaıǵa baılanysty túsinikteme berdi.

Onyń aıtýynsha, Astanadaǵy barlyq emhanada, onyń ishinde balalarǵa arnalǵan fıltrlik kabınetterde jumystyń qarqyny kúsheıgen. Kúni boıy kelýshiler legi azaımaıdy. Dárigerlerdiń basty talaby – vırýs belgileri baıqalǵanda ata-analardyń birden fıltrlik kabınetke júginýi. Sebebi alǵashqy belgilerdi jeńil qabyldaý nemese úıde uzaq ýaqyt em jasaý – aýrýdyń asqynýyna ákeletin negizgi faktorlardyń biri.

Sonymen qatar ata-analar kóbine dene qyzýyn túsiretin dárilerdi durys mólshermen bermeıdi. Mundaı preparattar balanyń jasyna jáne salmaǵyna sáıkes eseptelýi qajet. Dozanyń kóp nemese az bolýy aǵzaǵa qosymsha salmaq túsiredi. Dáriler ár alty saǵat saıyn ǵana berilýi tıis. Al temperatýrany 38,5°-qa jetkende ǵana túsirý kerek. Onyń aldynda aǵza vırýspen ózdiginen kúresedi. Tek tyrysý sındromy bar balalarda bul kórsetkish 37,5°-tan aspaýy tıis – bul toptaǵy balalar erekshe baqylaýdy qajet etedi.

Qala boıynsha epıdemıologııalyq ahýal ázirge turaqty, alaıda aıaqasty asqynýlar jıilep tur. Bul ásirese dárigerge kesh júginetin otbasylarda baıqalady.

«Balamnyń temperatýrasy múlde túspedi. Alǵashqy belgileri – jótel. Úıde bir apta emdep kórdik, biraq jaǵdaıy jaqsarmady. Aqyry jedel járdem shaqyrdyq. Osyndaı kezde ýaqyt sozyp, aýrýdy asqyndyryp almaý kerek.

Balam alǵashynda jótelip, dene qyzýy kóterilgen. Úı jaǵdaıynda emdep kórgenimmen, bir apta ishinde esh nátıje bolmady», – deıdi qala turǵyny Aıjan Anarbaeva.

Astanadaǵy JRVI ahýaly baqylaýda bolǵanymen, qaýip tolyq seıilgen joq.

Árbir ata-ana maýsymdyq vırýsqa salǵyrt qaramaı, alǵashqy belgiden bastap durys áreket etse, aýrýdyń aýyr túrlerine jol bermeýge bolady.

Dárigerlerdiń aıtýynsha, jaýapty ári ýaqtyly qadam – ár otbasynyń qaýipsizdigin qamtamasyz etetin basty shart.

Aıta keteıik, Aqmola oblysynda 32 adam «gonkong tumaýyn» juqtyrǵan.