Elordalyq balýan qyz Azııa chempıonatynyń qola júldegeri atandy
ASTANA. KAZINFORM — Taılandtyń Pattaııa qalasynda 15 jasqa deıingi (U-15) jáne 20 jasqa deıingi (U-20) sportshylar arasynda kúres túrlerinen Azııa chempıonaty ótip jatyr, dep habarlaıdy elorda ákimdiginiń resmı saıty.
Jarystyń alǵashqy kúni boz kilemge shyqqan Astana qalasynyń sportshysy Djamılıa Mehdıeva U-15 jas sanatynda áıelder kúresinen 50 kelige deıingi salmaq dárejesinde sátti óner kórsetip, Azııa chempıonatynyń qola júldegeri atandy.
Qurlyq birinshiliginde Azııanyń úzdik jas balýandary erkin kúres, grek-rım kúresi jáne áıelder kúresi boıynsha chempıondyq ataqtar úshin baq synap jatyr.
— Búgin Allanyń qalaýymen U-15 jas sanatyndaǵy Azııa chempıonatynyń qola medalin jeńip aldym. Tórt beldesý ótkizip, osy nátıjege qol jetkizgenime óte qýanyshtymyn. Maǵan árdaıym qoldaý bildirip, senim artqan jattyqtyrýshylaryma, sondaı-aq únemi janymnan tabylyp, demeý kórsetip júrgen ata-anama alǵysymdy bildiremin. Bul meniń erkin kúresten halyqaralyq deńgeıdegi alǵashqy jarystarymnyń biri bolǵandyqtan, bul medaldiń men úshin mańyzy erekshe. Eń qıyn qarsylastarym Japonııa men Úndistan sportshylary boldy. Degenmen men úshin eń bastysy — óz kúresimdi kórsetý, qoryqpaý jáne sońyna deıin kúresý. Eger boz kilemge qoryqpaı shyǵyp, bar kúsh-jigerińdi salsam, nátıje mindetti túrde keledi dep senemin, — dedi Djamılıa Mehdıeva.
Sonymen qatar, búgin U-15 jas sanatynda elordalyq eki erkin kúres sheberi de boz kilemge shyǵady. Atap aıtqanda, Zamanbek Bektóre 44 kelige deıingi, al Zelımhan Tsıtskıev 80 kelige deıingi salmaq dárejesinde synǵa túsedi.
Aıta keteıik, Azııa chempıonaty 5 shildege deıin jalǵasady.
Budan buryn dzıýdodan Eýropa kýbogynda Ǵalymjan Qyryqbaı chempıon atanǵanyn jazdyq.
