Astanalyq balalar Qosshydan ákelingen bálishten ýlanǵan
ASTANA. KAZINFORM – Elordada bir top bala Qosshy qalasyndaǵy kásiporynnan alynǵan bálishten ýlandy. Bul týraly Aqmola oblysynyń bas sanıtar dárigeri Aınagúl Mýsına baspasóz máslıhatynda aıtty.
Onyń sózinshe, jyl basynan beri Aqmola oblysynda ishektiń ótkir ınfektsııalarymen aýyrýdyń 210 jaǵdaıy tirkelgen. Bul 2023 jylǵy jaǵdaımen salystyrǵanda 1,1 ese kóp. Negizgi sebeptiń biri – jeke bastyń gıgıenasyn saqtamaý, úı jaǵdaıynda ázirlengen sút ónimderi men jemis-jıdek, kókónis jeý.
Sondaı-aq ol Býrabaıǵa demalýǵa baryp ýlanǵan balalar týraly da málimet berdi.
«Jeke menshik demalys bazasynda balalarǵa saıahat uıymdastyrylǵan. Ol jerde tamaq istep, saqtaýǵa arnalǵan oryn bolmaǵan. Ýlanýǵa osy jaıt sebep bolǵan. Qyzmetkerlerdiń aǵzasynan stafılokokk tabyldy. Balalardyń bári úsh kúnniń ishinde taratyldy. Balalardyń bári basqa jaqtan kelgen bolyp shyqty. Eshbiri emhanaǵa jatqyzylǵan joq, mamandandyrylǵan medıtsınalyq kómek kórsetildi», - deıdi Aınagúl Mýsına.
Sanıtar dáriger Qosshy qalasynyń kásiporyn ruqsat qaǵazy bolmaǵanyna qaramastan Astanada bálish satqanyn aıtty.
«Tamaqtan jappaı ýlanýdyń taǵy bir deregi tirkeldi. Qosshy qalasyndaǵy kásiporyn ruqsat beretin qujattary bolmasa da «Lakomka» bálishin satyp kelgen. Bálishter ónimdi saqtaý tártibin oryndamastan tasymaldanǵan. Sonyń saldarynan Astanada 16 bala ýlanǵan. Ýlaný deregi elordada tirkelgenimen, kásiporyn bizdiń oblys aýmaǵynda bolǵandyqtan bizdiń statıstıkaǵa kirip otyr», - dedi oblystyń bas sanıtar dárigeri.
