Astanalyq ájeler ansambli Ázerbaıjandaǵy baıqaýda birinshi oryn aldy

ASTANA. KAZINFORM — Óner jarysynda ánshi ájelerimizben qatar Ózbekstannan jáne t. b. elderden kelgen 400-den asa úmitker saıysqa tústi, dep habarlaıdy elorda ákimdigi.

Astanada Esil aýdany boıynsha Belsendi uzaq ómir súrý ortalyǵynyń zeınetker ájelerinen quralǵan «Saǵynysh sazy» ansambli Baký qalasynda ótken «AZERBAIJAN GRAND FESTIVAL» án baıqaýynda júldeli birinshi orynǵa ıe boldy.

Festıval ultaralyq qarym-qatynas pen mýzykalyq mádenıetti nyǵaıtý maqsatynda naýryz aıynyń sońǵy kúnderi «Astana Stars» halyqaralyq konkýrstar komıtetiniń uıymdastyrýymen ótken bolatyn.

Ájeler ansambliniń ujymyna QR eńbegi sińgen mádenıet qaıratkeri Janarbek Iskendyrov jetekshilik etedi, al ansambldiń beldi júshesi Shárbat Qurmanova ansambldiń kórkemdik jumysymen jáne repertýaryn qalyptastyrýmen  aınalysady.

Ansambl óz jumysyn 2019 jyldyń jeltoqsan aıynda Saryarqa aýdanyna qarasty qalalyq ardagerler ujymynda bastady.

Óner ujymynyń alǵash qurylǵan kezde halyq ánderin oryndaýdan bastaǵan edi. Únemi shyǵarmashylyq izdeniste júrgen ansambldiń repertýary búginde ár túrli, án qorjynynda 80-ge jýyq án bar.

— Bizdiń ortalyqtyń ónerli zeınetkerleri halyqaralyq deńgeıdegi án baıqaýynan júldemen oralýy biz úshin úlken jetistik. «Saǵynysh sazy» ansambliniń qurylǵanyna 5 jyl toldy, jaqynda óziniń bes jyldyq eseptik kontsertin ótkizgen bolatyn. Bul óner ujymyna 62-72 jas aralyǵynda án aıtýmen áýestenetin ájeler jınalǵan. Ansambl árdaıym shyǵarmashylyq izdenis ústinde. Olardyń repertýary áralýan, terme, halyq jáne estradalyq ándermen qatar, basqa da janrdaǵy ánderdi oryndaıdy, — dep sózin túıindedi Esil aýdany boıynsha áleýmettik qyzmet kórsetý bóliminiń basshysy Janar Esenamanova.

Osy baıqaýda birinshi oryndy jeńip alǵan «Saǵynysh sazy» ardagerler ansambli Grekııanyń Salonıkı qalasynda ótetin GREECE GRAND FESTIVAL baıqaýyna joldama aldy.

Osyǵan deıin Ulttyq ulan áskerı tehnıkany sherýge daıyndap jatqany habarlandy.