Astanalyq áskerı 600 shaqyrymdyq ýltramarafonǵa attandy
ASTANA. KAZINFORM – Respýblıka kúnine oraı astanalyq áskerı qyzmetshi 600 shaqyrymdyq ýltramarafondy bastady. Bul qashyqtyqty jelaıaq Astana – Kókshetaý – Astana baǵytynda 5 kúnde eńserip, eldegi barlyq rekordty jańartýdy kózdep otyr.
Raýan Ábilhanov — 9 balanyń ákesi, Astana aýmaqtyq qorǵanys brıgadasynyń bólimshe komandıri, Qazaqstannyń áskerı sapynda 23 jyldan beri qyzmet etedi. Búgin de sportshyny qoldaýǵa jáne shyǵaryp salýǵa áriptesteri men jaqyn týystary keldi.
— Kóńil-kúıim óte keremet. Respýblıka kúnine arnaıy josparlap júgirýdi bastadym. Bul júgiriske úsh aı boıy tyńǵylyqty daıyndaldym. Ásirese tamaqtaný óte mańyzdy, nátıjeniń 70 paıyzy osyǵan baılanysty. Jol boıy jedel járdem kóligi, ózimizdiń jeke quram bar jáne jol polıtsııalary erip júredi, — dedi Raýan Ábilhanov.
Raýan úshin bul alǵashqy rekord emes.Buǵan deıin 350 shaqyrymdy eki táýlikte júgirip, Qazaqstan rekordtar kitabyna engen. Endi óz rekordyn jańartyp, múmkin emes nárseniń joq ekenin kórstkisi keledi.
Álemdik rekordtar kitabynyń Azııa jáne Afrıka elderi boıynsha tirkeý boıynsha bas ofıtseri Qýandyq Qudaıbergenov 600 shaqyrymnyń óte aýyr bolatynyn aıtýda.
Onyń ústine Onyń ústine Astanadan Kókshetaýǵa deıingi jol asfalt emes, betonnan jasalǵan. Bul da býynǵa aýyr júkteme túsiredi.
— Ádette adamdar qansha daıyndalsa da, 42 shaqyrymdyq marafondy áreń júgiredi. Al otandasymyz bes kúnde 600 shaqyrymdy eńserý úshin kúnine 120 shaqyrymdy júgirip otyrýy kerek. Arasynda tynyǵýǵa, tamaq ishýge ruqsat etilgen. Biz Strava qosymshasy arqyly bes kún boıy baqylap otyramyz. Onyń qaýipsizdigi men densaýlyǵyn basty nazarda ustaımyz. Álemde budan da úlken rekordtar bar. Biraq, bul rekordtyń ereksheligi — sanaýly kúnde júgirip ótý. Demek bul maqsaty oryndalsa, álemdik rekord ornaıdy, — dedi Rekordtar kitabynyń ókili.
Ýltramarafon 30 qyrkúıekte aıaqtalyp, Raýan Ábilhanov Astanaǵa oralady.
Aıta keteıik, qurlyq áskerleriniń «Ońtústik» óńirlik qolbasshylyǵy drondar saıysyn ótkizdi.