Astanalyq 19 jastaǵy boıjetken dánekerleýshi mamandyǵyn meńgerip júr
ASTANA. KAZINFORM — Dánekerleý isi er adamdarǵa tán mamandyq degen pikir qalyptasqan. Alaıda elordalyq Karına Baıantaýova bul pikirdi túbegeıli ózgertken arýlardyń qatarynan. 19 jastaǵy elordalyq qazir JOLTAP jobasy aıasynda elektrgazben dánekerleýshi kýrsynda oqyp jatyr.
Elorda ákimdiginiń resmı saıtynyń málimetinshe, Karına elektrgazben dánekerleýshi kýrsy týraly alǵash estigende, bastapqyda basym kópshilik tárizdi «Qolymnan kele me? Bul «erlerge arnalǵan» mamandyq qoı…» dep kúmándanǵanyn jasyrmaıdy. Alaıda joba bilim alýǵa daıyn, tájirıbeden ótýden qoryqpaıtyn árbir adam úshin bul mamandyqtyń qoljetimdi ekenin kórsetip berdi.
— Jobaǵa kelip, dánekerleýshi mamandyǵyn tańdap, kásibı túrde úırenýge den qoıdym. Bul meniń eńbek jolymdaǵy alǵashqy mamandyǵym bolmaq. Basynda qorqynysh bolǵanmen, ony erekshe mamandyqty ıgerýge degen qyzyǵýshylyǵym men yntam jeńip ketti. Biz áýeli bárin teorııa júzinde egjeı-tegjeıli túsinip aldyq. Qazir oqyp-bilgenimizdi YDA zaýytynda belsendi túrde is-tájirıbede qoldanyp jatyrmyz. Áýeli qaýipsizdik tehnıkasyn meńgerip, dánekerleý túrlerin úırendik. Endi jabdyqtardy baptaýdy jáne alǵashqy uqypty tigister jasaýdy ıgerip jatyrmyz. Barlyq aqparat qoljetimdi, bir nárseni túsinbeı qalyp jatsaq, oqytýshylarymyz birden aıtyp, jón siltep jiberedi. Jumysqa qajetti qural-jabdyqtar da jetkilikti, — deıdi ol.
Zaýyttaǵy ár sabaqtan keıin, joba qatysýshysynyń kásibı daǵdysy ǵana emes, ózine degen senimi de artyp keledi. Karına kýrsty támamdaǵannan soń, óziniń aldyna zor maqsattar qoıyp otyr.
— Qazir dánekerleýshiler suranysqa ıe ári jumysyna jaqsy jalaqy tólenedi. Sondyqtan men ózime qajetti tájirıbeni osy jerden jınaqtap, ІІІ razrıadty elektrgazben dánekerleýshi qujatyn alyp, osy zaýytqa nemese basqa usynylǵan zaýyttarǵa jumysqa ornalasýdy maqsat tutyp otyrmyn. JOLTAP bul baǵytta men úshin kásibı joldaǵy naqty kómek, senimdi «startap» bolyp otyr, — deıdi joba qatysýshysy.
Aıta keteıik, JOLTAP — elordadaǵy jumyssyzdyq deńgeıin tómendetýge, turǵyndardyń kásibı daǵdylary men tabysyn arttyrýǵa baǵyttalǵan áleýmettik joba. Joba aıasynda jumysqa ornalasý, qysqamerzimdi kásibı jáne tsıfrlyq daǵdylar boıynsha oqý kýrstary ótkiziledi.
JOLTAP jobasyna qatysý úshin qaladaǵy halyqtyń kóp shoǵyrlanatyn jerlerinde ornalasqan modýldik pýnktterde tegin oqýǵa jazylýǵa bolady. Joba aıasyndaǵy qysqamerzimdi oqytý baǵdarlamasy 18-50 jas aralyǵyndaǵy Astana turǵyndary úshin tegin túrde qoljetimdi. Oqýdan keıin qatysýshylarǵa sertıfıkat beriledi. Al túlekterdiń kandıdatýralary JUMYSTAP.KZ atty jumys jáne qyzmetkerlerdi izdeýge arnalǵan saıtta tegin jarnamalanady.
Budan buryn Astana tórinde 4 jyldan soń quraq kórpe stılindegi shyrsha qaıta tigilgenin jazǵanbyz.