Astana–Qaraǵandy tasjolynda adam ólimine ákelgen jol apaty JI-kameraǵa túsip qaldy
ASTANA. KAZINFORM — JI-kameralar Astana — Qaraǵandy — Almaty tasjolyndaǵy adam ólimine ákelgen jol apatyn tirkedi, dep habarlaıdy «QazAvtoJol» UK baspasóz qyzmeti.
Jasandy ıntellekt elementteri bar kameralar respýblıkalyq mańyzy bar Astana — Qaraǵandy — Almaty avtomobıl jolynyń 51-shaqyrymynda bolǵan jol-kólik oqıǵasyn anyqtady.
Beınejazbadan Astana qalasy baǵytynda qozǵalyp kele jatqan Mercedes avtokóliginiń basyp ozý manevrin jasaý kezinde «Gazel» avtokóligimen bir baǵytta soqtyǵysqanyn kórýge bolady.
— Soqqy saldarynan «Gazel» júrgizýshisi kólikti basqara almaı, joldyń júrý bóliginen shyǵyp ketip, jol jıeginde aýdarylǵan. Jol-kólik oqıǵasy saldarynan bir adam qaza tapty. Oqıǵanyń naqty sebepteri men mán-jaıyn quzyrly organdar anyqtap jatyr, — delingen habarlamada.
«QazAvtoJol» júrgizýshilerdi belgilengen jyldamdyq rejımi men jol qozǵalysy erejelerin qatań saqtaýǵa, al basyp ozý manevrin jasamas buryn joldaǵy jaǵdaıdy jan-jaqty baǵalaýǵa shaqyrady. Jol ústindegi bir ǵana táýekeldi árekettiń quny adam ómirine teń bolýy múmkin.
Buǵan deıin Aqmola oblysynda jol apatynan «Gazel» jolaýshysy qaza tapqanyn jazǵan edik.
