Astana—Qaraǵandy tasjolynda jeti kólik soqtyǵysyp, bir adam qaza tapty
QARAǴANDY. KAZINFORM — Boran men kórý múmkindiginiń tómendigi eldiń negizgi magıstraldarynyń birinde iri jol-kólik oqıǵasyna sebep boldy. Jeti avtokólik birimen biri soqtyǵysyp, saldarynan bir adam qaza taýyp, taǵy bir júrgizýshi jaraqat aldy.
Jol-kólik oqıǵasy 10 naýryz kúni saǵat 11:00 shamasynda Astana — Qaraǵandy avtojolynda, Oshaǵandy kenti mańynda, Qaraǵandy baǵytynda boldy.
Alǵashqy aqparatqa sáıkes, trassanyń 147-shi kılometri shamasynda jeti kólik soqtyǵysqan.
Apatqa aýa raıynyń kúrt nasharlaýy aq tútek boran sebep bolǵan. Sol ýchaskede aýa raıynyń qolaısyzdyǵynan jol múlde kórinbeı qalǵan.
Polıtsııa derekterine qaraǵanda, soqtyǵys tizbek reaktsııasymen bolǵan. Aldymen Chevrolet Nexia kóligi júrip kele jatyp, Chery Tiggo avtokóligimen soqtyǵysqan. Keıin krossoverge Toyota Land Cruiser soǵylǵan. Odan keıin jol talǵamaıtyn kólikti júk kóligi soqqan. QazAvtoJol qyzmettik pıkapy men ÝAZ Hunter avtokóligi de jol apatyna ushyraǵan.
Apat saldarynan Toyota Land Cruiser avtokóliginiń jolaýshysy alǵan jaraqattarynan sol jerde qaza tapty.
Sonymen qatar, ÝAZ Hunter júrgizýshisi zardap shekti. Ol medıtsınalyq mekemege jetkizilip, qajetti kómek kórsetilip jatyr. Dıagnoz naqtylanyp jatyr.
Atalǵan kólikter jol qozǵalysyna shekteý engizilgenge deıin jolǵa shyqqan.
Oqıǵa ornynda polıtsııa qyzmetkerleri, Tótenshe jaǵdaılar departamentiniń bólimsheleri jáne jedel medıtsınalyq kómek brıgadasy jumys istep jatyr. Qajetti tergeý jáne protsessýaldyq sharalar júrgizilip, apat sebepteri anyqtalyp jatyr.
— Qaraǵandy oblysy polıtsııa departamenti júrgizýshilerdi aýa raıyn qatań eskerip, jol qozǵalysyna qoıylǵan shekteýlerdi saqtaý qajet dep eskertedi. Boran men kórinis nashar bolǵan kezeńde eldimekenderden tys joldarǵa shyqpaǵan jón, sebebi bul jol qozǵalysyna qatysýshylardyń ómiri men densaýlyǵyna qaýip tóndirýi múmkin, — dep habarlady Qaraǵandy oblystyq polıtsııa departamentiniń baspasóz qyzmeti.
Eske salsaq, QazAvtoJol birneshe oblysta kólik qozǵalysyna shekteý qoıylǵanyn habarlaǵan bolatyn.
