Astanadaǵy aty joq kóshelerdiń birine armıan álipbıiniń negizin qalaǵan ǵalymnyń aty beriledi

ASTANA. KAZINFORM — Astana qalasynyń Nura aýdanyndaǵy, «Astana-Arena» stadıony men «Saryarqa» velotreginiń arasynda ornalasqan 750 metrlik kóshege armıan álipbıiniń negizin qalaǵan lıngvıst Mesrop Mashtotstyń esimi beriletin boldy. Bul kóshe Turan dańǵyly men Qabanbaı batyr kóshelerin jalǵap tur. 

Astana tilderdi damytý jáne arhıv isi basqarmasynyń basshysy Sáken Esirkep qoǵamdyq keńes otyrysyna osyndaı usynyspen kelipti.

Aıtýynsha, byltyrǵy 14-15 sáýirde Memleket basshysy Qasym-Jomart Toqaevtyń Armenııa Respýblıkasyna resmı sapary bolyp, sol kezde Astana qalasy kósheleriniń birine Mesrop Mashtotstyń atyn, al Erevan qalasyndaǵy nysandardyń birine Abaı Qunanbaıulynyń esimin berý týraly ýaǵdalastyq jasalǵan kórinedi.

— Bul rette 2025 jyly 11 aqpan kúni Erevan qalasynyń Aqsaqaldar keńesi Erevannyń Avan aýdanynda ornalasqan saıabaqqa Abaı Qunanbaıulynyń esimin berý týraly sheshim qabyldady. Osyǵan oraı, biz de óz tarapymyzdan 16 sáýirde Astana qalasy Onomastıka komıssııasy otyrysyn uıymdastyryp, Astana qalasynyń ataýsyz kóshesine armıan álipbıin jasaýshy, ádebıeti men jazýynyń, ulttyq mektep pen pedagogıkalyq oıdyń negizin salýshy, aǵartýshy — Mesrop Mashtotstyń esimin berý týraly sheshim qabyldadyq.

Atalǵan kóshe Nura aýdanynda, «Astana-Arena» stadıony men «Saryarqa» velotreginiń arasynda ornalasqan. Turan dańǵyly men Qabanbaı batyr kóshelerin qosady. Uzyndyǵy — 750 metr, — dedi basqarma basshysy.

Qoǵamdyq keńes músheleri usynysty qoldap daýys berdi.

Sondaı-aq, atalǵan jıynda Astana ákimdigi taǵy da skverge qajetti jer satyp alýǵa bıýdjetten aqsha surap otyrǵany málim boldy.