Astanaǵa jeke kólikterdiń syrttan kirýine shekteý qoıyla ma – ákimdik jaýaby
ASTANA. QazAqparat – Ekologııa jáne tabıǵı resýrstar mınıstrliginiń saıtynda jarııalanǵan Astana qalasy Bas josparynyń jobasynda elordadaǵy kólik aǵynyn retteý úshin 2035 jylǵa qaraı kireberis joldarǵa kólik aýystyratyn toraptar salý máselesi ózekti ekeni aıtylǵan. Mundaı toraptar salynsa, qala aýmaǵynda tirkelmegen jeke kólikterdiń kirýine shekteý qoıyla ma? Astana qalasy Sáýlet jáne qala qurylysy, jer qatynastary basqarmasy basshysy orynbasary Aıan Smaǵulov redaktsııanyń osyndaı saýalyna jaýap berdi, dep habarlaıdy QazAqparat tilshisi.
«Avtomobılderdiń qalaǵa kirýin retteýge qatysty aıtsaq, álemdik tájirıbe iri qalalardyń ınfraqurylymyn ońtaıly paıdalanýǵa jáne turaqty damýǵa baǵyttalǵan kólik suranysyn basqarýdyń ártúrli quraldaryn biledi. Mundaı quraldar birtutas, biraq belgili bir qala úshin keıbir aıyrmashylyqtar bolýy múmkin. Kólik transplantatsııalaý toraby – qalaishilik qoǵamdyq jolaýshylar kóliginde odan ári qozǵalystar jasaı otyryp, jeke kólikti qala shetine qaldyrýǵa múmkindik beretin kólik suranysyn basqarý quraldarynyń biri. Tyıymdardy nemese shekteýlerdi engizý tek kólik quraldarymen ǵana emes (mysaly, qalaǵa kirýdegi keptelister), sonymen qatar belgili bir ýaqyt kezeńindegi áleýmettik-ekonomıkalyq jaǵdaı sııaqty kóptegen faktorlarmen anyqtalady», - dep jazady Aıan Smaǵulov.
Sondaı-aq, ol Astanaǵa jeke kólikterdiń kirýin shekteý máselesi Bas jospardy ázirleýshilerdiń quzyryna kirmeıtinin aıtady.
«Mundaı mindetter Bas jospardyń quzyreti bolyp tabylmaıdy jáne qalanyń kólik júıesin jobalaýdyń kelesi kezeńderinde anyqtalýy múmkin», - delingen jaýapta.
