Astanaǵa jaqyn aýyl mańynan jalaqysy 450 myń teńgelik jumys oryndary ashylady
ASTANA. KAZINFORM – Aqmola oblysynyń ákimi Marat Ahmetjanov Jibek Joly telearnasyna bergen suhbatynda óńirdegi jańa ındýstrııalyq aımaqtyń iri jobalary týraly málimet berdi.
— Aqmola ındýstrııalyq aımaǵynyń bir ereksheligi — astyqty tereńdetip óńdeý arqyly natrıı, amın qyshqyldaryn jáne taǵamǵa qosatyn qyshqyldar óndiredi. Taıaý Shyǵysta ol ónimderge degen suranys óte joǵary. Astyqtyń baǵasynan 10-15 ese qymbat baǵaǵa satýǵa bolady. Eń bastysy, ınvestorlar elimizde zaýyt salyp, jergilikti turǵyndardy jumysqa alady. Qosylǵan qun da, salyqtyń bári ózimizde qalady. Olar Aqmola oblysynyń 5 myń turǵynyn jumyspen qamtýǵa mindetteme alyp otyr, — dedi ol «Ýáde» baǵdarlamasynda.
Aımaq basshysynyń aıtýynsha, bıdaıdy tereńdetip óńdeıtin zaýyt Jibek joly aýylynyń mańynda salynady.
— Bul bir jaǵynan ınvestorlarǵa da tıimdi. Óıtkeni zaýyt mańynda ony jumys kúshimen qamtamasyz etetin eldi mekender bolǵany abzal. Óndiris 2028 jyly bastalady. Ol jerde qalashyq boı kóteredi. Búgingi tańda ol aýmaqqa sý, jaryq, gaz jelisin tartyp berdik. Budan bólek, túrkııalyq kompanııa pestıtsıd shyǵarýdy kózdep otyr. Al sıngapýrlyq ınvestorlar qurylys jabdyqtaryn shyǵarmaqshy. Gazdy 600 ese syǵymdap, tasymaldaıtyn kompanııa da osy aımaqqa kelip jatyr. Indýstrııalyq aımaqqa kirgen 7 kompanııanyń úlesi 2 trln teńgege jetti. Odan qansha salyq túsetinin eseptep qoıdyq. Jumysshylardyń aılyǵy 450 myń teńgeden kem bolmaıdy degen ýaǵdalastyq bar. Bul olarǵa da paıdaly. Óıtkeni ınvestor bizge jany ashyǵannan kelip otyrǵan joq. Shyǵaratyn ónimge suranys joǵary bolyp tur. Olar Qazaqstan jerinde óngen bıdaıdy 40 túrge bólip, óńdeıtinderin aıtty. Biz de olardyń Qytaıdaǵy óndiris oryndaryn aralap, múmkindikterine kóz jetkizip qaıttyq. Syrtqy ister mınıstrligi de óz qorytyndylaryn berdi. Odan bólek, Qoıandy tóńireginde, Qosshy qalasynda da óndiris oryndaryn ashý josparda tur, — dedi oblys ákimi.
Buǵan deıin Aqmola oblysynyń Aqkól qalasynda mal azyǵyna arnalǵan proteın óndiretin zaýyt ashylǵanyn jazǵanbyz.