Astanaǵa ýshýdan iri halyqaralyq jıynǵa álemdik deńgeıdegi sportshylar keldi
ASTANA. KAZINFORM – 7-17 maýsym aralyǵynda Astanada BUU-nyń Órkenıetter arasyndaǵy dıalogtyń halyqaralyq kúnine oraılastyrylǵan ýshýdan halyqaralyq oqý-jattyǵý jıyny ótip jatyr.
Sporttyq is-sharany Halyqaralyq ýshý federatsııasy QR Ulttyq ýshý federatsııasymen birlesip, QHR-dyń Qazaqstandaǵy Elshiligi jáne QR Týrızm jáne sport mınıstrliginiń qoldaýymen uıymdastyrdy.
Astanadaǵy oqý-jattyǵý jıynyna Qazaqstan, Qytaı, Ózbekstan, Qyrǵyzstan jáne Tájikstannan 70-ten astam sportshy, jattyqtyrýshy jáne mamandar qatysyp jatyr. Baǵdarlama aıasynda qatysýshylar sportshylar men jattyqtyrýshylar quramynyń daıyndyq deńgeıin arttyratyn birlesken jattyǵýlar, sheberlik synyptary, bilim berý dáristeri ótip jatyr.
Jıynnyń ashylý saltanatyna QHR-dyń Qazaqstandaǵy Tótenshe jáne Ókiletti Elshisi Han Chýnlın, QR Týrızm jáne sport mınıstrligi Dene shynyqtyrý jáne sport isteri komıteti tóraǵasynyń orynbasary Amanbaı Nurmuhanbetov, Qazaqstan ýshý jáne kýng-fý federatsııasynyń bas hatshysy Mádına Astamırova qatysty.
QHR Elshisi Han Chýnlın Qazaqstan men Qytaı arasyndaǵy yntymaqtastyqtyń joǵary deńgeıin atap ótip, elimizde ýshýdy damytýǵa baǵyttalǵan jobalardy qoldaýdy jalǵastyrýǵa daıyn ekenin bildirdi.
A.Nurmuhanbetovtyń aıtýynsha, mundaı is-sharalar halyqaralyq baılanystardy nyǵaıtý, sportty damytý jáne joǵary deńgeıdegi sportshylardy daıarlaý úshin mańyzdy. M.Astamırova qatysýshylar, jattyqtyrýshylar, sport uıymdarynyń ókilderine jáne is-sharanyń seriktesterine Qazaqstandaǵy ýshýdy damytýǵa jáne halyqaralyq yntymaqtastyqty nyǵaıtýǵa qosqan úlesteri úshin alǵys aıtty.
Rásimniń jarqyn jáne shabyttandyratyn sáti ýshý taolýdan Qazaqstan men Qytaı quramalary sportshylarynyń birlesken óner kórsetýi boldy.
Qazaqstandyq ýshý jáne kýng-fý federatsııasynyń prezıdenti Gadjı Gadjıevtiń Astanadaǵy Qytaı mádenı ortalyǵynyń dırektory Van Tsınpın, Qytaı ýshý qaýymdastyǵy bas hatshysynyń orynbasary Chjan Leı, sandadan Qytaı ulttyq quramasynyń joǵary sanatty jattyqtyrýshysy jáne tálimgeri Chen ıAnshenmen kezdesýinde Qytaı delegatsııasynyń ókilderi Qazaqstan úkimetine, Qazaqstan federatsııasyna halyqaralyq oqý-jattyǵý jıyndaryn joǵary deńgeıde uıymdastyrǵany úshin alǵys bildirdi.
- Búginde Astanany halyqaralyq sporttyq almasý jáne halyqtar arasyndaǵy dostyq baılanystardy nyǵaıtýdyń mańyzdy alańy dep ataýǵa bolady, - dedi Qytaı ýshý qaýymdastyǵy basshylyq quramynyń ókili Chjan Leı.
Qazaqstandyq ýshý jáne kýng-fý federatsııasynyń prezıdenti Gadjı Gadjıev osyndaı bastamalardyń otandyq ýshý mektebin damytý jáne sportshylardy halyqaralyq jarystarǵa daıyndaýda mańyzdylyǵyn atap ótti.
- Biz elimizde osy sport túrin tıimdi damytýǵa bar kúshimizdi salyp jatyrmyz. Qazaqstan ulttyq quramasy ýshý sanda jáne ýshý taolýdan kóptegen halyqaralyq chempıonattarǵa belsendi qatysyp keledi. Umtylys, joǵary eńbek jáne ýshýǵa degen súıispenshiliktiń arqasynda qazaqstandyq sportshylar joǵary nátıjelerge qol jetkizip, álemdik arenada medaldardy jeńip alyp otyr. Biz Halyqaralyq ýshý federatsııasynyń jáne osy sport túriniń otany – dostas Qytaıdyń joǵary bilikti mamandarynyń nazaryn joǵary baǵalaımyz. Bizdiń sportshylarymyzǵa jáne Ortalyq Azııa elderiniń ýshý qurama komandalarynyń sportshylaryna berilgen tájirıbe men bilim jeńister men ortaq jetistikterdiń jańa tarıhynyń bastaýy bolady dep senemiz, - dedi G. Gadjıev.
Halyqaralyq oqý-jattyǵý jıyny 17 maýsymǵa deıin jalǵasady. Uıymdastyrýshylar atap ótkendeı, baǵdarlama qarqyndy jattyǵý tsıkly, bilim berý is-sharalary, oqytý dáristeri jáne Qazaqstan jáne Ortalyq Azııa elderinde ýshýdy odan ári damytýǵa baǵyttalǵan praktıkalyq sabaqtardy qamtıdy.
Osyǵan deıin Qazaqstan men Qytaı ýshý sporty boıynsha yntymaqtastyqty kúsheıtip jatqany týraly jazdyq.
