Astanaǵa úsh oblystan 400 tonnadan astam aýyl sharýashylyǵy ónimi jetkizildi
ASTANA. KAZINFORM — Astanada Mańǵystaý, Almaty jáne Abaı oblystary taýar óndirýshileriniń qatysýymen kezekti aýyl sharýashylyǵy jármeńkesi ótip jatyr.
Turǵyndarǵa fermerlerden tikeleı jetkizilgen et, balyq, sút jáne azyq-túlik ónimderiniń túr-túri usynylyp otyr. Bul azyq-túliktiń qoljetimdiligin arttyryp qana qoımaı, otandyq óndirýshilerdi qoldaýǵa múmkindik berdi.
Atap aıtqanda, úsh óńirdiń aýyl sharýashylyǵy taýaryn óndirýshileri Astanaǵa 400 tonnadan astam ónim ákeldi.
Onyń ishinde 170 tonna kókónis pen jemis-jıdek, 100 tonna et jáne et ónimderi, 40 tonna bal, 25 tonna sút ónimderi, 17 tonna baqsha ónimi, 10 tonna balyq jáne 40 tonnadan astam basqa da azyq-túlik bar.
— Bul jármeńke bastalǵaly turaqty kelip turamyn. Sebebi jármeńke tek qoljetimdi baǵaǵa azyq-túlik alý múmkindigi ǵana berip qoımaı, sapasy joǵary, ár óńirdiń ózine tán erekshe ónimderin alýǵa septik etedi.
Máselen, ótken aptada Qyzylordanyń kúrishi men tary-talqany, qaýyndary úshin kelsem, osy joly Mańǵystaýdyń shubaty, qyzyl balyǵy, Semeıdiń shı baýyrsaǵy men Sarjal qymyzy, Almatynyń aporty úshin keldim. Jalpy jármeńke halyqqa erekshe bir merekelik kóńil-kúı syılaıdy. Toltyryp bárin ala berý mindet emes, óńirdiń ózine tán erekshe ónimderinen dám tatý sol ólkege baryp kelgendeı áser syılaýy mańyzdy, — deıdi elordalyq Aıgúl Quldanaeva.
Abaı oblysy aýyl sharýashylyǵy basqarmasynyń málimeti boıynsha óńirden elordaǵa 200 tonnadan astam aýyl sharýashylyǵy ónimi jetkizildi. Jármeńkege oblystyń ár óńirinen kelgen sharýa qojalyqtary men kásipkerler qatysyp, óz ónimderin usynyp otyr.
Jármeńke aıasynda bul óńirden 50 tonnaǵa jýyq et, 70 tonna bal, 30 tonna kókónis, 30 tonna qarbyz, sondaı-aq sút jáne shujyq ónimderi, qymyz, ulttyq taǵamdar men basqa da aýyl sharýashylyǵy ónimderi keń assortımenti usynylýda.
Eń bastysy, barlyq ónim jergilikti aýyl sharýashylyǵy taýaryn óndirýshilerden tikeleı jetkizildi. Bul deldaldar sanyn azaıtyp, ónimderdi tutynýshylarǵa qoljetimdi baǵamen usynýǵa múmkindik beredi.
Basty maqsat — Abaı oblysynyń sapaly ári tabıǵı ónimderin elorda turǵyndaryna tanystyrý, jergilikti óndirýshilerdi qoldaý jáne óńiraralyq saýda baılanystaryn nyǵaıtý.
Jármeńke «Qazanat» ıppodromynyń avtoturaǵynda, Qarqaraly tasjoly, 1 mekenjaıynda ótýde. Sondaı-aq jármeńke kezinde elorda turǵyndary men qonaqtaryna yńǵaıly bolý úshin atalǵan orynǵa № 18, 37 jáne 303 avtobýs baǵyttary qatynaýda. Jármeńke saǵat 09:00–den 18:00–ge deıin jumys isteıdi.
