Astanaǵa Úndistan boksshylary kele jatyr - Myrzaǵalı Aıtjanov

Bul týraly bokstan Qazaqstan ulttyq quramasynyń bas bapkeri Myrzaǵalı Aıtjanov QazAqparat tilsishsine bergen suhbatynda málim etti.

-Ózbekstan astanasynda eresekter arasynda bokstan ótetin Azııa chempıonatyna az ýaqytqaldy. Daıyndyqtaryńyz qalaı?

- Jaman emes. Alaıda, dál qazir boksshylarymyz óz úılerinde demalyp jatyr. Erteń, ıaǵnı sáýirdiń 15-i kúni Astanada jınalyp, Azııa birinshiligine sońǵy oqý jattyǵýymyzdy bastaımyz. 29 sáýirde Tashkentke attanamyz. 30 sáýirde alǵashqy irikteý jarystary bastalatyn bolady. Fınaldyq jarystar 7 mamyrda ótedi.

-Boksshylar demalyp jatqaly qansha ýaqyt boldy?

- Asa kóp bolǵan joq. Jaqynda ǵana birneshe elde birlesken oqý-jattyǵý jıynyn ótkizip keldik. Bir-eki iri halyqaralyq týrnırge qatystyq. Germanııanyń Galle qalasynda ótken «Chemistry Cup» halyqaralyq týrnırinde 4 boksshymyz altyn medal jeńip aldy. Bunyń barlyǵy - jattyǵýdyń jemisi. Jalpy daıyndyǵymyz jaman emes.

-Endi Azııa oıyndaryna deıin ózge eldermen birlesken oqý-jattyǵýy jıyna bola ma, álde boksshylar jeke jattyǵa ma?

- Astanaǵa Úndistan boksshylary kele jatyr. Olarmen Azııa oıyndaryna daıyndyq barysyndaǵy sońǵy jattyǵýymyz bolmaq. Astanadaǵy jattyǵý ortalyǵynda qyzyqty jekpe-jekter bolady. Tájirıbe almasamyz.

-Osy qurlyq birinshiliginde Gambýrgte ótetin álem chempıonatyna joldamalar sarapqa salynatynyn bilemiz. Qazaq boksshylarynyń basty qarsylastary qaı el bolmaq?

- Bul «sary qurlyq» dodasyna 30-ǵa jýyq elden 200-den astam boksshy qatysady. Basty qarsylasymyz ózbekter ekeni aıtpasaq ta belgili. Olar Rıo Olımpıadasynda aldymyzdy orap ketti. Bul joly da aıanyp qalmasy anyq. Alaıda, Úndistan, Iran, Iordanııa, Qytaı, Qyrǵyzstan, Mońǵolııa, Pákistan, Tájikstan, Fılıppın, Shrı-Lanka, Ońtústik Koreıa sııaqty elderge de jaı qaramaý kerek. Qazir Azııa elderinde ǵana emes, álemde boks qatty damyp kele jatyr.

-Azııa birinshiligine kimderdi aparǵaly jatyrsyz?

- Osy Astanadaǵy oqý-jattyǵý jumystarymyzdy aıaqtaǵannan keıin belgili bolady.

-Áńgimeńizge rahmet!